मुंबई: कोल्हापूरच्या (Kolhapur) जनतेने महाविकास आघाडीवर विश्वास ठेवून उत्तर मतदारसंघासाठी (Kolhapur North Bypoll election) झालेल्या पोटनिवडणुकीत महाविकास आघाडी आणि काँग्रेसच्या उमेदवार जयश्री जाधव यांना प्रचंड मतांनी निवडून दिले. कोल्हापूरातल्या (Kolhapur) जनतेने विकासाला निवडले आहे याबद्दल कोल्हापूरकरांचे त्यांनी मनापासून आभार मानले. तसेच मे महिन्यातील पहिल्या आठवड्यात दर्शनासाठी अयोध्येला जाणार असल्याचे पर्यटन मंत्री आदित्य ठाकरे (Aditya Thackeray) यांनी माध्यमांशी बोलताना सांगितले.

यावेळी ते म्हणाले, कोल्हापूर तसेच महाराष्ट्राचा विकास निश्चितपणे करणार आहोत. संघर्षाचा काळ आता संपला आहे. आशीर्वाद घेण्यासाठी लवकरच अयोध्येला जाणार असून याची तारीख लवकरच जाहीर करणार असल्याचे त्यांनी सांगितले.

कोल्हापूरविषयी बोलताना ठाकरे म्हणाले, कोल्हापूरच्या जनतेने विकास कोण करतयं हे ओळखल आहे. शिवसेनेने दादरमध्ये हनुमान जयंती निमित्त महाआरतीचे नियोजन केले आहे. यासंदर्भात बोलताना ते म्हणाले, आम्ही वर्षानुवर्ष महाआरती करत आलो आहोत. आता एक दोन पक्ष महाआरती करत आहेत म्हणून याची चर्चा होताना दिसते आहे. कोरोना काळानंतर नागरीक उत्साहाने सण-समारंभ साजरे करत आहेत असे स्पष्टीकरण त्यांनी दिले.