अँटिलिया बाहेर स्कॉर्पियो कारमध्ये सापडलेल्या स्फोटक प्रकरणात काल तब्बल १२ तासांच्या चौकशीनंतर पोलीस अधिकारी सचिन वाझे यांना अटक झाली. अंबानी यांच्या घराबाहेर आढळलेली कार, त्यानंतर ही कार ज्यांच्याकडे होती, त्या मनसुख हिरेन यांचा झालेला मृत्यू. एकूणच हे सर्व प्रकरण संशयास्पद आहे. मनसुख हिरेन आणि सचिन वाझे परस्परांना ओळखत होते. त्यामुळेच सचिन वाझे हे प्रमुख संशयित आहेत. एकूणच या प्रकरणात वाझे कुटुंबीयांची काय भावना आहे ? ते सुधर्म वाझे यांनी एबीपी माझाशी बोलताना सांगितले. 

सुधर्म वाझे हे सचिन वाझे यांचे बंधु आहेत. दोन दिवसांपूर्वीच ते मुंबईत येऊन सचिन वाझेंना भेटून गेले. "सचिन वाझे यांनी त्यांच्या व्हॉट्स अॅपवर जे स्टेटस ठेवलं होतं, त्याच प्रकारची त्यांची भावना आहे" असे सुधर्म वाझे म्हणाले. "सचिन वाझे सक्षम अधिकारी आहेत, ते तपासात सहकार्य करतील यात शंका नाही" असे सुधर्म वाझे म्हणाले. सचिन वाझेंचा स्वभाव कसा आहे? या प्रश्नावर सुधर्म वाझे यांनी, एक पोलीस अधिकारी कसा असला पाहिजे?, बुद्धी चातुर्य हे सर्व गुण त्यांच्यामध्ये असल्याचे सांगितले. 

अँटिलियाजवळ स्कॉर्पियोसोबत दिसलेल्या 'त्या' कारबाबत धक्कादायक खुलासा

"सध्याची कुटुंबीयांची स्थिती कोणाच्याही लक्षात येणार नाही. एखाद्यावर जेव्हा असा प्रसंग येतो, त्यालाच ते समजते" असे सुधर्म वाझे म्हणाले. दोन महिन्यात मी यातून बाहेर येईन, असं सचिन वाझेंनी म्हटलं होतं. त्यावर सुधर्म वाझे म्हणाले कि, "त्यांना या प्रकरणात  अडकवलं गेलं तर ते अनिश्चित आहे. सचिन वाझेंच्या अटकेची बातमी अधिकृतपणे कोणी सांगितली नाही. प्रसारमाध्यमांमधूनच आम्हाला समजलं."