शिवसेनेचे खासदार संजय राऊत यांनी रविवारी आपल्या लेखातून गृहमंत्री अनिल देशमुख यांच्यावर निशाणा साधला. दुसरीकडे केंद्रीय गृहमंत्री अमित शाह आणि राष्ट्रवादीचे अध्यक्ष शरद पवार व प्रफुल्ल पटेल यांची अहमदाबाद येथे भेट झाल्याची चर्चा रंगली. या भेटीचा राष्ट्रवादीच्या नेत्यांनी इनकार केला तर अमित शाह यांनी, 'अशा गोष्टी सार्वजनिक स्तरावर बोलायच्या नसतात', असं सांगत चर्चांना खतपाणी घातलं. या साऱ्या विविध मुद्द्यांवर संजय राऊत यांनी आज मुंबईत आपलं मत व्यक्त केलं.

"त्या भेटीत सस्पेंस ठेवण्यासारखं काय आहे? देशाचे गृहमंत्री अमित शाह आणि शरद पवार यांच्यात जर भेट आणि चर्चा झाली असेल तर त्यात चुकीचं काय? एखादा मोठा नेता किंवा खासदार गृहमंत्र्यांना भेटला तर त्यात काहीही वावगं नाही. अमित शाह यांना आम्हीही भेटू शकतो. कोणीही भेटू शकतं. ते देशाचे गृहमंत्री आहेत, त्यामुळे अशा भेटींमध्ये काहीही चूक नाही", असं संजय राऊत म्हणाले.

"शिवसेनेने केलेली पापं..."; भाजपच्या प्रसाद लाड यांची खोचक टीका

"अमित शाह यांनी या भेटीबद्दल बोलताना सांगितलं की काही चर्चा या सार्वजनिकरित्या सांगितल्या जात नाहीत. पण मला असं वाटतं की भेट कितीही गुप्त ठेवण्याचा प्रयत्न केली तरी कधी ना कधी बंद दाराआडच्या चर्चा सार्वजनिक होतातच. मात्र, एक लक्षात ठेवा की राजकीय बैठका या कधीही गुप्त नसतात. त्यातील चर्चा कधी ना कधी बाहेर येतातच", असा विश्वास त्यांनी व्यक्त केला.

"सत्तेत असलो तरीही 'सामना' वाचत नाही"

"गेल्या काही दिवसात ज्या घटना घडत आहेत, त्यामुळे देशपातळीवर महाराष्ट्राचं नाव काहीसं खराब झालं आहे. राष्ट्रवादीच्या खासदार सुप्रिया सुळे यांनीही एका मुलाखतीत याबद्दल मत व्यक्त केलं आहे. मी देखील माझ्या स्तंभात अशाप्रकारचं मत व्यक्त मांडलं. महाराष्ट्राला एक प्रतिष्ठा आहे. त्यामुळे राज्याचं नाव खराब झालं हे सत्य असलं तरी असं व्हायला नको होतं म्हणून आम्ही कळकळ व्यक्त करतो आहोत. यात कोणतीही वैयक्तिक टीका नाही", असं आपल्या रोखठोक सदराबाबत राऊतांनी स्पष्ट केलं.