मुंबई: लॉकडाऊन शिथील झाल्यामुळे मुंबई पुढे कचऱ्याची समस्या वाढली आहे. मागील दहा दिवसात कचऱ्याच्या प्रमाणात तब्बल 1 हजार मेट्रीक टनने वाढ झाली आहे. तर,सफाईकामागर इतर ठिकाणी वळवल्याने अनेक भागात कचरा उचलला जात नसल्याच्या तक्रारी वाढल्या आहेत.

मुंबईत दिवसाला 6 हजार 300 मेट्रीक टनच्या आसपास कचरा जमा होतो. पण लॉकडाऊनच्या काळात हे प्रमाण 4 हजार 300 मेट्रीक टनवर आले होते. त्यामुळे कचरा उचलण्यासाठी कामगारांची संख्या कमी करण्यात आली होती.

हेही वाचा: अत्यावश्यक सेवेसाठी एसटीच्या बसेस वाढणार; नव्याने सोडणार 70 बसेस..

मुंबईत रोज झाडलोट आणि कचरा उचलण्यासाठी 29 हजार कामगार कार्यरत असतात. तर लॉकडाऊनच्या काळात ही संख्या 17 हजारावर आणण्यात आली होती. मात्र,गेल्या 10 - 12 दिवसांपासून कचऱ्याच्या प्रमाणात वाढ झालीअसून रोज 5 हजार 200 मेट्रीक टन कचरा गोळा केला जात आहे. 

लॉकडाऊनच्या काळात कचरा उचलण्याच्या वेळा बदलण्यात आल्या होत्या. त्या आता जेथे तक्रारी येत आहेत अशा विभागात पुर्ववत केल्या जात असल्याचे एका अधिकाऱ्यानं सांगितले.

कचरा गाड्यांवरील चालकांना रुग्णवाहीका चालवण्याची जबाबदारी देण्यात आली आहे असा दावा  विलेपार्ले येथील भाजपचे नगरसेवक अभिजीत साटम यांनी केला आहे. विलेपार्ले विभागात रस्त्यावर कचरा उचलला जात नसून याकडे आता पालिकेने लक्ष द्यावे असेही त्यांनी सांगितले. पावसाळा सुरु झाला असून तत्काळ कचरा उचलणारी यंत्रणा पुर्ववत करावी अन्यथा आजार पसरण्याची भितीही त्यांनी व्यक्त केली आहे.

हेही वाचा: मान्सूनविषयीच्या 'या' १० भन्नाट गोष्टी तुम्हाला माहिती आहेत का? नक्की वाचा...

सील केलेल्या इमारतींमधील कचऱ्याची विल्हेवाट वैद्यकिय कचऱ्याप्रमाणे लावली जाते. नियमीत कचरा उचलणाऱ्या वाहनांमधून हा कचरा उचलला जात नाही. मात्र आता संपुर्ण इमारत सिल न करता संबंधित कोविड बाधित व्यक्तीचे घर अथवा मजला सिल केला जातो. मात्र,या इमारतीवर कोविडचा रुग्ण आढळल्याचा फलक लावला जातो. त्यामुळे नियमीत कचरा उचलणारे कामगार संपुर्ण इमारतीचा कचरा उचलत नाही अशाही काही तक्रारी येत आहेत.

amount of garbage has increased in mumbai read full story