मुंबई : भ्रष्टाचाराच्या आरोपांमुळे (corruption allegations) अडचणीत आलेले माजी गृहमंत्री अनिल देशमुख (Anil Deshmukh) यांच्या विरोधात आता महानगर दंडाधिकारी न्यायालयाने (court) आज समन्स (summons) जारी केले. वारंवार समन्स बजावूनही ईडीच्या चौकशीला हजर न झाल्याबद्दल त्यांच्याविरोधातील खटल्याच्या कारवाईला न्यायालयाने सुरुवात केली आहे. त्यामुळे देशमुख यांच्या अडचणीत भर पडली आहे.

माजी पोलिस आयुक्त परमबीर सिंग यांनी देशमुख यांच्यावर भ्रष्टाचाराचे आणि खंडणी वसुलीचे गंभीर आरोप केले होते. या प्रकरणी सीबीआयने गुन्हा दाखल केला आहे. तसेच ईडीनेही चौकशी सुरू केली असून आतापर्यंत देशमुख यांना पाचवेळा समन्स बजावले आहे. परंतु देशमुख यांनी एकदाही चौकशीला हजेरी लावली नाही. त्यामुळे आता ईडीने देशमुख यांच्याविरोधात दंडाधिकारी न्यायालयात दावा दाखल केला आहे. अतिरिक्त मुख्य महानगर दंडाधिकारी आर. एम. नेरळीकर यांनी शुक्रवारी या दाव्याची दखल घेऊन खटल्याच्या कारवाईला सुरुवात केली. देशमुख यांना १६ नोव्हेंबर रोजी न्यायालयात हजर राहण्याचे समन्स जारी केले.

भादवि कलम १७४ नुसार सरकारी कर्मचाऱ्यांनी दिलेल्या आदेशाचे पालन न करुन अडथळा आणणे, असा आरोप ईडीने देशमुख यांच्यावर ठेवला आहे. देशमुख यांना २०, २८ जून, २, ३० जुलै आणि १६ ऑगस्ट असे एकूण पाच समन्स बजावले आहेत. पण एकाही समन्सची त्यांनी दखल घेतली नाही. त्यामुळे देशमुखांविरोधात दावा दाखल केल्याचे ईडीच्या वतीने ॲड. श्रीराम शिरसाट आणि ॲड. अरविंद आघाव यांनी न्यायालयात सांगितले. या कलमानुसार एक महिना कारावास किंवा पाचशे रुपये दंड अथवा दोन्ही अशी शिक्षेची तरतूद आहे.