ठाणे -  नाट्यक्षेत्रात एक नावाजलेले रत्न दत्तात्रय घोसाळकर यांचे मंगळवारी मध्यरात्री हृदयविकाराच्या झटक्याने ठाणे येथे निधन झाले. महागिरी कोळिवाडा येथील राहत्या घरी त्यांनी अखेरचा श्वास घेतला. जवाहर बाग स्मशानभूमीत त्यांच्यावर दुपारी अंतिम संस्कार केले जाणार आहेत. यदा कदाचित नाटकाचे निर्माते दत्ता घोसाळकर यांना रात्री एकच्या सुमारास हृदयविकाराचा झटका आला, त्यातच त्यांची प्राणज्योत मालवली. दत्तविजय प्रॉडक्शनच्या माध्यमातून 17 नाटके त्यांनी निर्माण केली. त्यात आईचं घर उन्हाचं, यदा कदाचित, देहभान, तनमन तुझ्याविना, रामनगरी, हम पांच सारखे वेगळे विषय त्यांनी हाताळले. ते एक उत्कृष्ट मराठी नाट्य निर्माते होते. 
दत्तात्रय घोसाळकरांनी त्यांच्या संस्थेतर्फे ठाण्यातील अनेक लेखक, दिग्दर्शक, कलाकारांना रंगमंचावर प्रथम आणण्याचा प्रयत्न केला 

मुंबई परिसरातील बातम्या वाचण्यासाठी येथे क्लिक करा

कलाकाराचा एक वकूब असतो. मराठी रंगभूमीवर काही निर्मिती संस्थादेखील आपापला वकूब राखून नाटकं करतात. दत्तविजय प्रॉडक्शन्स ही संस्था गेल्या शतकाच्या नव्वदीच्या दशकाअंती 'यदाकदाचित' या तुफान यशस्वी नाटय़निर्मितीने रसिकांच्या मनात एक वेगळे स्थान निर्माण केले होते. 'यदाकदाचित' हे नाटक खरं तर संतोष पवार यांच्या एकांकिकेतून जन्माला आलेलं. त्या काळी संतोष पवार हा महाविद्यालयीन एकांकिका स्पर्धांचा बादशहा होता. दत्तविजय संस्थेने संतोष यांची एकांकिका व्यावसायिक नाटक म्हणून रंगभूमीवर आणली आणि दत्ता घोसाळकर व त्यांचे बंधू अरविंद घोसाळकर यांनी मराठीत नवनिर्मात्यांच्या एन्ट्रीचा पायंडा रचला. आज जवळ जवळ वीस वर्षांचा इतिहास या संस्थेचा आहे आणि या इतिहासात एकाहून एक हिट नाटकं आहेत. त्यांचे यदा कदाचित रिटर्न हे नाटक 26 डिसेंबर पासून रंगभूमीवर येणार होते. कोरोनानंतर त्यांचा हा पहिला प्रयोग होणार होता. यदा कदाचित रिटर्न्स हे नाटकात बाहुबली सिनेमाचा बॅकड्रॉप घेऊन शेतकऱ्यांच्या आत्महत्येचा प्रश्न मांडला गेला आहे. हे नाटक नव्याने रंगभूमीवर येण्या आधीच घोसाळकर यांचे निधन झाल्याने कला क्षेत्रातून एकच हळहळ व्यक्त होत आहे.