मुंबई: आर्यन खान ड्रग्स प्रकरणातील (aryan khan drugs case) पंच प्रभाकर साईलने (prabhakar sail) गंभीर आरोप केले आहेत. त्यामुळे या प्रकरणाला एक वेगळं वळण लागलं आहे. एका व्हिडिओमधुन प्रभाकर साईलने २५ कोटींची डील करून हे प्रकरण दाबण्याचा प्रयत्न करण्यात आला, असा खळबळजनक आरोप केला आहे. आता प्रभाकर साईलला राज्य सरकारकडून सुरक्षा पुरवण्यात येणार आहे. गृहमंत्री दिलीप वळसे पाटील (dilip walse patil) यांनी याबाबत पोलिसांकडून माहिती घेतली.

प्रभाकर साईलने नेमके काय आरोप केलेत?

क्रूझवर झालेल्या छापेमारीवेळी प्रभाकर साईल किरण गोसावीसोबत होता. सॅम नावाच्या व्यक्तीला आणि गोसावीला एनसीबी कार्यालयाजवळ भेटताना त्याने पाहिले. ''आर्यनला ताब्यात घेतल्यानंतर शाहरुखची मॅनेजर पूजाला हे दोघे भेटले. त्यांच्यामध्ये निळ्या मर्सिडीज कारमध्ये बोलणे झाले. हे प्रकरण दाबण्यासाठी हे बोलणं सुरू होते. २५ कोटींमध्ये ही डील झाली होती"

"त्यानुसार ८ कोटी समीर वानखेडे सरांना द्यायचे आहेत आणि उरलेले आपल्याला वाटून घ्यायचे आहेत, असे किरण गोसावी फोनवरून कोणासोबत तरी बोलला होता. तसेच एनसीबीने मला खोट्या पंचनाम्यावर सही करायला लावली'' असे गंभीर आरोप या व्हिडिओमध्ये करण्यात आले आहेत.

समीर वानखेडे काय म्हणाले?

"आपल्या बाबत खोटे दस्तावेज प्रसिद्ध केले जात आहेत. आपण या प्रकाराला चॅलेंज करणार आहोत. माझ्या मूळ गावी जा आणि तपासा. आपला जो जन्म दाखला सोशल मीडियावर प्रसिद्ध केला जात आहे, तो खोटा आहे" असं समीर वानखेडे यांनी म्हटलं आहे. "आपल्या विरोधात खोडसाळ प्रकार सुरू आहे. याला आपण कायदेशीर उत्तर देऊ. याबाबत आपण लवकरच जाहीर खुलासा करणार आहोत" असे समीर वानखेडे यांनी म्हटलं आहे.