मुंबई : मुंबईतील रुग्णालयात उपचार घेतल्यानंतर 80 वर्षांच्या आईला गावी सोलापूर जिल्ह्यातील अक्कलकोटला नेले. नंतर लगेच लॉकडाऊन सुरू झाल्यामुळे आईला भेटायला जाता आले नाही. त्यातच आई गेल्याची बातमी मिळाली. खूप प्रयत्न केले, पोलिसांच्या हाता-पाया पडलो; पण आईच्या अंत्यसंस्कारासाठी गावी जाता आले नाही. माझ्या हाताने अग्नी देण्याची आईची अंतिम इच्छा अपूर्ण राहिल्याची सल कायम राहील, अशी भावना पाणावलेल्या डोळ्यांनी मुंबईत नोकरी करणाऱ्या महांतेश सगुमळे यांनी व्यक्त केली. 

हे वाचा ः  दुर्दैवी..! पाणी-चाऱ्याविना पशू-पक्ष्यांची तडफड

डोंबिवलीतील खांबालपाडा या ठिकाणी 38 वर्षीय महांतेश सगुमळे कुटुंबासह राहतात. एका खासगी कंपनीत काम करणारे महांतेश मूळचे अक्कलकोट येथील निंगदळ्ळी येथील आहेत. त्यांच्या 80 वर्षीय आई मोहनबाई तेथेच राहत होत्या. गेल्या महिन्यात गंभीर आजारी पडल्यानंतर त्यांना महांतेश यांनी मुंबईत आणून उपचार केले. प्रकृती सुधारल्यानंतर त्यांनी गावी जाण्याची इच्छा व्यक्त केली. आपले काही बरेवाईट झाल्यास तूच अग्नी दे, अशी इच्छा आईने महांतेश यांच्याकडे व्यक्त केली होती. 
आईला गावी सोडून महांतेश मुंबईत परतल्यानंतर देशभरात कोरोना संकटामुळे लॉकडाऊन सुरू झाले. काही दिवसांनी आईची प्रकृती खालावली. लॉकडाऊन संपल्यानंतर गावी जाऊन आईची विचारपूरस करू, असा विचार महांतेश यांनी केला. परंतु, प्रकृती खालावतच गेलेल्या मोहनबाई यांनी आपल्या लाडक्‍या मुलाची वाट बघत 13 एप्रिलला अखेरचा श्‍वास घेतला. महांतेश यांना पहाटे 5 वाजता ही बातमी समजली. त्यांनी सकाळी 6 वाजता डोंबिवलीतील टिळकनगर पोलिस ठाणे गाठले. आईच्या अंत्यसंस्कारासाठी अक्कलकोटला जायचे असल्याचे त्यांनी सांगितले. परंतु, पोलिसांनी त्यांना पत्र देण्यास नकार देत स्वत:च्या जबाबदारीवर गावाला जाण्यास सांगितले. 
महांतेश यांनी गावी जाण्याची तयारी केली. रस्त्यात कुणी हटकले तर? पत्नी व मुलांना क्वारंटाईन करण्यात आले तर? प्रवासात पेट्रोल नाही मिळाले तर? अनेक प्रश्‍न त्यांना सतावू लागले. त्यांनी पेट्रोलसाठी पोलिसांकडे पत्र मागितले, मात्र नकार मिळाला आणि कल्याणमधील परिमंडळ 3 कार्यालयात जाण्यास सांगितले. महांतेश धावतपळत सर्व कागदपत्रे घेऊन तेथे पोहोचले. परंतु, वरिष्ठ पोलिस अधिकारी बैठकीत असल्याने त्यांना बसण्यास सांगण्यात आले. महांतेश यांनी दीड तास वाट पाहिली; मात्र बैठक संपली नाही. तोपर्यंत सकाळचे 10 वाजून गेले होते. 

तळीरामांचा घसा कोरडाच राहणार! लॉकडाऊननंतरही मद्य विक्री नाहीच

गावी मृतदेह अधिक काळ ठेवता येत नव्हता. तलाठ्याने दुपारी 12 वाजता अंत्यसंस्कार करण्यास सांगितले होते. अखेरीस महांतेश पोलिस ठाण्यातून डोंबिवलीतील घरी परत गेले. गावाकडे जाणे शक्‍य नव्हते, त्यामुळे महांतेश यांनी व्हॉट्‌सऍपवर आईचे अंतिम दर्शन घेण्याचे ठरवले. महांतेश यांनी पत्नी आणि दोन मुलांसह व्हॉट्‌सऍपवरून आईचे अंतिम दर्शन घेतले. मोहनबाईंच्या मृतदेहाला अग्नी देण्यात आला. आईची अंतिम इच्छा पूर्ण करता आली नाही, याचे दु:ख कायम राहील, असे महांतेश यांनी व्यक्त केली. 

VIDEO : लॉकडाऊन वाढवलं म्हणून मुंबईत हजारो नागरिक उतरलेत रस्त्यावर, लोकांचा धीर सुटतोय ?

"परवानगीसाठी कुणीही भेटले नाही' 
याबाबत पोलिसांशी संपर्क साधला असता, अधिकाऱ्यांनी बोलण्यास नकार दिला. अशी कोणतीही परवानगी पोलिस देऊ शकत नाहीत. त्यासाठी वेगळी ऑनलाईन व्यवस्था करण्यात आली आहे. त्यासाठी कुणीही आपल्याला भेटले नाही, असे एका वरिष्ठ पोलिस अधिकाऱ्याने सांगितले.