मुंबई: मुख्यमंत्री उद्धव ठाकरे (uddhav thackeray) दोन महापालिकांमध्ये भेदभाव करत असल्याचा आरोप पुणे महापालिकेतील सत्ताधारी भाजपाने (bjp)केला आहे. पुणे महानगरपालिकेने (pmc)लस खरेदीसाठी जागतिक निविदा काढण्याची परवानगी मागितली होती. पण आमच्या मागणीकडे दुर्लक्ष केलं आणि मुंबई महानगरपालिका लस खरेदीसाठी जागतिक निविद मागवतेय, असं पुणे भाजपाने म्हटलं आहे. (bjp accuses Chief minister uddhav thackeray favouring bmc & discriminating with pmc)

भाजपाने गुरुवारी महापालिका प्रशासनाला राज्य सरकारच्या परवानगीची वाट न पाहता लसींसाठी जागतिक निविदा काढण्याचे निर्देश दिले. "महापौर मुरलीधर मोहोळ, सभागृहाचे नेते गणेश बिडकर आणि पुण्यातील भाजपाच्या वरिष्ठ नेत्यांनी पीएमसी आयुक्तांना राज्य सरकारच्या परवानगीची वाट न पाहता, लसीसाठी तात्काळ जागतिक निविदा काढण्याची विनंती केली" असे भाजपाचे आमदार सिद्धार्थ शिरोळे यांनी सांगितले.

"इथे लोकांचे जीव धोक्यात आहेत. थोड्याही विलंबामुळे परिस्थिती गंभीर होईल. आम्ही पीएमसी आयुक्तांना मुख्यमंत्र्यांच्या परवानगीची वाट न पाहता, तात्काळ जागतिक निविदा काढण्यास सांगितले आहे" असे शिरोळे म्हणाले. सिद्धार्थ शिरोळे यांनी मुख्यमंत्र्यांवर पदाचा गैरवापर करत असल्याचा आरोप केला.

पुणे महानगरपालिकेने २० एप्रिललाच २५ लाख लस खरेदींची टेंडर काढण्यासाठी परवानगी मागितली होती. पण मुख्यमंत्र्यांनी त्याकडे दुर्लक्ष केले. "मुख्यमंत्री फक्त एका शहरातील लोकांचे प्राण वाचवण्यासाठी सर्व स्त्रोतांचा वापर करत असून पदाचा गैरवापर करतायत. पुणे महापालिकेला लस खरेदीसाठी २३ दिवस परवानगी दिली नाही. तथाकथित बनावट बीएमसी मॉडेलच्या पीआरसाठी हे सर्व केले, असा आरोप त्यांनी केला. सभागृहाचे नेते गणेश बिडकर यांनी सुद्धा असाच आरोप केला. राज्य सरकार कोरोनाकाळात पीएमसी आणि बीएमसीमध्ये भेदभाव करतय. मुंबई महापालिकेला प्राधान्य दिले जात आहे, असा आरोप गणेश बिडकर यांनी केला.