मुंबई: 'द ललित' (The lalit hotel) या प्रसिद्ध हॉटेल मध्ये लसीकरण होत असल्याच समजल्यानंतर काल मुंबईच्या महापौर किशोरी पेडणेकर (Mumbai mayor kishori pednekar) यांनी अचानक या ठिकाणी धडक दिली. 23 तारखेपासून दिवसाला 500 जणांना लस (vaccine doses) दिल्याचं समोर आलंय. गंभीर बाब म्हणजे या लसी घरच्या सारख्या साध्या फ्रीज मध्ये स्टोर करण्यात आल्यात ज्यावर महापौरांनी आक्षेप घेतलाय. (Bjp mla atul bhatkhalkar slam mayor kishori pednekar over Mumbai vaccination at five star hotels)

महापौरांच्या या धडक कारवाईवर भाजपाचे कांदिवलीचे आमदार अतुल भातखळकर यांनी टीका केली आहे. "पंचतारांकित हॉटेलात लसीकरणाबाबत केंद्र सरकारने संताप व्यक्त केल्यावर महापौरांना जाग आलेली दिसतेय. सगळं टक्केवारीच साटेलोटे आहे. केंद्राची नजर वळली म्हणून धाडीची नौटंकी. पंचतारांकित हॉटेल्सनाही लसी मिळतायत, @mybmc अजून कटोरा घेऊन फिरते आहे" अशी टीका भातखळकर यांनी केली आहे.

"सुश्रुत आणि क्रीटीकेअर 2 हॉस्पिटलने ललित सोबत करार केला. यामध्ये ही परवानगी केंद्राकडून आहे मात्र याची माहिती महापालिकेला दिलीच नाही जे गंभीर आहे. कोल्ड स्टोरेज मेंटेन केलं गेलं नाही यावर माझा आक्षेप आहे. यावर दोन्ही हॉस्पिटलला जाब विचारणार आहे" असं किशोरी पेडणेकर यांनी म्हटलं आहे.

"लस देण्यासाठी ज्या sop असतात त्याचं उल्लंघन याठिकाणी झालं. महापालिकेला इथे लसीकरण होत असल्याचं कळवायला हवं होतं. चौकशी करून पुढे निर्णय घेऊ" असे महापौर म्हणाल्या. मुंबईत हॉटेलमध्ये, खासगी हॉस्पिटल्समध्ये होणाऱ्या लसीकरणावर आता टीका सुरु झालीय. २५० आणि ४०० रुपयांच्या लसींचे डोस १ हजार, १४०० रुपयांना दिले जातायत, त्यावर काँग्रेस नेत्यांनी टीका सुरु केलीय.