डोंबिवली - राजस्थान, मध्यप्रदेश आणि छत्तीसगड मधील निवडणुकीत भाजपला घवघवीत यश मिळाल्यामुळे कल्याण पूर्वेत भाजपकडून जल्लोष करत विजय उत्सव साजरा केला गेला. दरम्यान भाजप आमदार गणपत गायकवाड यांनी पुन्हा एकदा एक गौप्यस्फोट केला आहे.

कल्याण आणि भिवंडी लोकसभेवर भाजपचे उमेदवार विजयी होतील असे त्यांनी या जल्लोषात म्हटले आहे. कल्याण लोकसभा मतदारसंघ हा मुख्यमंत्री एकनाथ शिंदे यांचे सुपुत्र खासदार डॉ. श्रीकांत शिंदे यांचा मतदारसंघ असून यावर पुन्हा भाजपने दावा केल्याचे दिसून येत आहे.

कल्याण लोकसभा मतदारसंघ हा शिवसेना शिंदे गटाचे खासदार डॉ. श्रीकांत शिंदे यांचा मतरदार संघ आहे. शिवसेनेचा हा बालेकिल्ला असून हा मतदारसंघ भाजपकडे यावा यासाठी भाजप जोरदार प्रयत्न करत आहे.

तर हा मतदारसंघ हातातून जाऊ नये यासाठी खासदार डॉ. शिंदे हे जोर लावत आहेत. राज्यात सत्तेत भाजप व शिंदे हे मित्रपक्ष असले तरी पण स्थानिक पातळीवर दोन्ही पक्षातील अंतर्गत वाद हे चव्हाट्यावर येत आहेत.

मानपाडा पोलीस ठाण्यातील वरिष्ठ पोलीस निरीक्षकाची बदली वरून हा वाद चर्चेला आला. सार्वजनिक बांधकाम मंत्री रविंद्र चव्हाण, आमदार गणपत गायकवाड यांनी यावेळी शिंदे गटाच्या विरोधात परखड भूमिका मांडली.

उपमुख्यमंत्री देवेंद्र फडणवीस यांनी हा वाद शांत केला असला तरी अध्ये मध्ये वादाची ठिणगी ही पडताना दिसतेय. भाजप आमदार गणपत गायकवाड आणि शिंदे गटाचे शहर प्रमुख महेश गायकवाड यांच्यातील वाद तर काही केल्या कमी होत नाही. त्यातच आमदार गायकवाड हे विकास कामावरून शिंदे गटाला कानपिचक्या घेण्याची एक पण संधी सोडत नाही.

त्यातच आमदार गायकवाड यांनी पुन्हा एकदा गौप्यस्फोट केला आहे. तीन राज्यांत भाजप आघाडीवर असून कल्याण पूर्वेत जल्लोष साजरा करण्यात आला. यावेळी भाजप आमदार गणपत गायकवाड म्हणाले, पंतप्रधान नरेंद्र मोदी यांच्यावर नागरिकांचा विश्वास आहे.

यामुळे या तिन्ही राज्यांत भाजप आघाडीवर आहे. मध्यप्रदेश मध्ये सुध्दा बहुमताने भाजप आलेले आहे. त्यामुळे हा जल्लोष आम्ही करत आहोत. येणाऱ्या काळात याठिकाणी राज्याच्या निवडणूका असतील किंवा केंद्राच्या निवडणुका असतील यासर्व ठिकाणी भाजप आघाडीवर असेल. तसेच कल्याण लोकसभा आणि भिवंडी लोकसभेत जे आमच्या भाजपचे उमेदवार उभे असतील ते निवडून येतील असे ते म्हणाले.