मुंबई : अतिजोखमीच्या (हाय रिस्क) संशयित कोरोना रुग्णांची तपासणी वेगाने करण्यासाठी महापालिकेने 17 वाहनतळांच्या जागा निश्‍चित केल्या आहेत. तसे आदेश आयुक्त प्रवीणसिंह परदेशी यांनी सर्व विभागांच्या सहायक आयुक्तांना दिले आहेत. खासगी प्रयोगशाळांच्या मदतीने तपासणी करण्यात येईल. 

हे वाचलं का? ः लाॅकडाऊन ब्रेक : `मेट्राे ३` भुयारी मार्गाचे काम धीम्या गतीने

मुंबईत शुक्रवारी एका दिवसात 200 हून अधिक कोरोनाबाधित आढळले. मुंबईत सुमारे 5000 "हाय रिस्क' व्यक्ती आहेत. कोरोना रुग्णांच्या संपर्कात आलेल्या व्यक्तींना अतिजोखमीचे मानले जाते. त्यांच्या तपासणीसाठी महापालिकेच्या 17 वाहनतळांवर विशेष केंद्रे सुरू करण्यात येत आहेत. लॉकडाऊनमुळे वाहनतळ ओस पडले आहेत. संशयित रुग्णांची वेगाने तपासणी झाल्यास तत्काळ उपचार सुरू करता येतील. त्यासाठी थायरोकेअर, मेट्रोपोलिस, एसआरएल, इन्फर्न, सबअर्बन डायग्नॉस्टिक्‍स आदी प्रयोगशाळांची मदत घेतली जात आहे. 

महत्त्वाचे : सुरक्षा रक्षकांवर कोरोनाची जबाबदारी ​

येथे आहे व्यवस्था
भायखळा, काळाचौकी, शिवडी, परळ-शिवडी, आर्टेशिया इमारत (लोअर परळ), इंडिया बुल्स फायनान्स सेंटर (प्रभादेवी), कोहिनूर मिल (दादर), एकसर व्हिलेज (बोरिवली पश्‍चिम), विकास प्लाझा (मुलुंड पश्‍चिम), रुणवाल ऑडिटोरियम (मुलुंड पश्‍चिम), रुणवाल ग्रीन (नाहूर), कांजूर व्हिलेज (कांजूरमार्ग) आणि आर मॉलजवळ (घाटकोपर).