मुंबई- महाविकास आघाडीची मुंबईतील बैठक पार पडली आहे. बैठकीनंतर ठाकरे गटाचे नेते आणि खासदार संजय राऊत आणि काँग्रेसचे प्रदेशाध्यक्ष नाना पटोले यांनी माध्यमांना प्रतिक्रिया दिली आहे. बैठकीमध्ये जागवाटपाबाबत अत्यंत सकारात्मक चर्चा झाली आहे. आघाडी मजबूत आहे, आमच्यात एकजूट आहे. तिन्ही पक्ष एकत्र आहोत, असं संजय राऊत म्हणाले.

४८ जागांवर सकारात्मक चर्चा झाली आहे. काहीही चिंता करण्याची गरज नाही. काही लोक देव पाण्यात ठेवून बसले असतील. आम्ही ३० तारखेला पुन्हा बैठक घेणार आहोत. आम्ही वंचित बहुजन आघाडीचे प्रमुख प्रकाश आंबेडकर यांना अधिकृतरीत्या निमंत्रण पाठवलं आहे. ३० तारखेला ते देखील बैठकीला उपस्थित राहतील, असं राऊत म्हणाले. (Cautious reaction of nana Patole after Prakash Ambedkar harsh criticism)

आमजी जी भूमिका आहे, तीच भूमिका प्रकाश आंबेडकरांची आहे. आमच्यात मतभेद नाहीत. राजू शेट्टी यांच्यासोबत सुद्धा व्यवस्थित चर्चा सुरु झाली आहे. ३० तारखेपर्यंत सर्व निर्णय होतील. प्रत्येत जागा ही महाविकास आघाडीची आहे. आम्ही ४८ जागा जिंकणार हा आमचा निर्धार आहे. नितीश कुमार सोडून जाणार नाहीत. इंडिया आघाडीचे ते एक स्तंभ आहेत. आम्हाला त्यांच्यावर पूर्ण विश्वास आहे, असं देखील संजय राऊत म्हणाले.

नाना पटोलेंची प्रतिक्रिया

प्रकाश आंबेडकरांची काही मतं होती. आमची भूमिका वरिष्ठांनी त्यांच्यासमोर मांडली. संजय राऊत यांनी सांगितल्याप्रमाणे प्रकाश आंबेडकर आणि त्यांचे नेते ३० जानेवारीला बैठकीसाठी येतील. जे काही वाटत होतं ते त्यांनी मांडलं होतं. पण, आता गैरसमज दूर झालेला आहे, असं नाना पटोले म्हणाले आहेत. दरम्यान, ३० जानेवारीला महाविकास आघाडीच्या बैठकीला प्रकाश आंबेडकर आपले प्रतिनिधी पाठवण्याची शक्यता आहे.

महाविकास आघाडीमध्ये वंचित बहुजन आघाडीला समावून घेण्याबाबतचं निमंत्रणाचं पत्र प्रकाश आंबेडकर यांना पाठवण्यात आलंय. पण, आंबेडकरांनी नाना पटोलेंवर निशाणा साधला आहे. तुम्ही महाराष्ट्रातील जनतेशी मनाचा खेळ करत आहात, तुमच्या मेंदूत कदाचित लोचा झाला आहे, असं त्यांनी म्हटलं. आंबेडकरांनी महाविकास आघाडीच्या पत्रावरील नाना पटोलेंच्या स्वाक्षरीला आक्षेप घेतला आहे.(Latest Marathi News)