Latest Mumbai news: चेंबूर येथील अग्नितांडवात सात सदस्य गमावणाऱ्या गुप्ता कुटुंबीयांच्या घरातील सोन्याचे दागिने आणि साडेचार लाखांची रोकड गायब आहे. याप्रकरणी चेंबूर पोलिस ठाण्यात तक्रार दाखल करण्यात आली आहे.

या दुर्घटनेत बचावलेल्या छेदिराम गुप्ता यांची कन्या वनिताने चेंबूर पोलिस ठाण्यात सोमवारी तक्रार अर्ज देताना घरातील दहा ते १२ तोळ्यांचे सोन्याचे दागिने आणि साडेचार लाखांची रोख रक्कम चोरीला गेल्याचा संशय व्यक्त केला आहे.

रविवारी संध्याकाळी घरातील पहिल्या माळ्यावर असलेल्या कपाटातील तिजोरीचा दरवाजा उघडा असल्याचे त्यांनी तक्रारीत नमूद केले आहे. यावेळी तक्रारीची खातरजमा करून पुढील कारवाई केली जाईल, अशी माहिती चेंबूर पोलिसांनी दिली आहे. दरम्यान, रविवारी रात्री गुप्ता कुटुंबातील मरण पावलेल्या सदस्यांवर अंत्यसंस्कार करण्यात आले.