डोंबिवली: भर रस्त्यात त्याने एकाला चाकूने भोसकत हत्या केली. त्यानंतर पोलीस ठाण्यात हजर होत आपल्याला मारहाण झाल्याचा बनाव केला. पोलिसांनी रुग्णालयात त्याला उपचारासाठी पाठविले.

तो जाताच पोलिसांना सदर व्यक्तीने हत्या केल्याची माहिती मिळाली. तोच पोलिसांनी रुग्णालयात धाव घेत आरोपीला अटक केल्याची फिल्मी घटना कल्याण पूर्वेत घडली आहे.

अमोल लोखंडे असे मयत व्यक्तीचे नाव असून त्याच्या हत्येप्रकरणी कोळसेवाडी पोलिसांनी जयेश डोईफोडे याला अटक केली आहे.

कल्याण पूर्वेत रविवारी रात्री ही घटना घडली आहे. अमोल आणि जयेश यांच्यात पूर्वीपासून वाद होते. चार दिवसांपूर्वी अमोल याने जयेशच्या एका मित्राला परिसरात दहशत का माजवता असे विचारले. यामुळे जयेश चिडला होता.

याच गोष्टीचा राग मनात धरुन अमोलचा काटा काढण्याचे त्याने ठरवले. अमोल रविवारी रात्री परिसरात उभा असताना जयेशने मागून येऊन त्याच्यावर चाकूने हल्ला केला. या हल्ल्यात अमोलचा जागीच मृत्यू झाला.

अमोलची हत्या केल्यानंतर जयेश हा स्वतः कोळसेवाडी पोलीस ठाण्यात हजर झाला. त्याने आपल्याला मारहाण झाल्याचे पोलिसांना सांगितले. पोलिसांनी त्याला मेमो देऊन रुग्णालयात उपचारासाठी पाठवलं.

काही वेळाने पोलिसांना हत्येची माहिती मिळाली. जयेशनेच ही हत्या केल्याची माहिती समजताच पोलिसांनी तात्काळ रुग्णालयात धाव घेत जयेशला ताब्यात घेतले. कोळसेवाडी पोलीस ठाण्यात हत्येची घटना नोंद करण्यात आली असून पोलीस जयेशची अधिक चौकशी करत आहेत.