मुंबई : विधान परिषदेच्या बारा जागांसंदर्भात चर्चा करण्यासाठी मुख्यमंत्र्यांसह, उपमुख्यमंत्री आणि बाळासाहेब थोरात हे महाविकास आघाडीचे मंत्री आज राज्यपालांची भेट घेणार अशी चर्चा आज शिवसेनेच्या गोटातून सुरू झाली होती. पण या भेटीबाबत दुपारपर्यंत काँग्रेस आणि राष्ट्रवादीच्या मंत्र्यांना माहितीच नसल्याचं आता समोर आलंय. त्याचबरोबर सरकारकडून भेटीसाठी वेळच मागितली नसल्याचं राजभवनातून सांगण्यात आलं. त्यामुळं या भेटीबाबत समन्वयाचा अभाव असल्याचं दिसून आलं आहे.

राज्यपाल आणि महाविकास आघाडी मंत्र्यांच्या बैठकीबाबत राजभवनावर विचारले असता अशी वेळच मागितली नसल्याचे राजभवनावरून स्पष्ट करण्यात आलं. त्यामुळे खरंच अशी बैठक आहे का? हा प्रश्न निर्माण झाला होता. तिन्ही पक्षांमध्ये राज्यपालांसोबतच्या बैठकीबाबत समन्वय नसल्यानं हा प्रकार घडल्याचं बोललं जात आहे. त्यामुळे अखेर मिलिंद नार्वेकर राजभवनावर राज्यपलांच्या भेटीसाठी राजभवनावर पोहोचल्याचं सूत्रांकडून कळतंय.

सूत्रांच्या माहितीनुसार, पण महाविकास आघाडीतील काही नेते राज्यपालांची संध्याकाळी ६.३० वाजताची वेळ मिळाल्याचे सांगत होते. तर दुसरीकडे अशी कोणतीही वेळ मागितली नसल्याचं राजभवनवरून सांगितलं जात होतं.

दरम्यान, विरोधी पक्षनेते देवेंद्र फडणवीस राजभवनवर एका कार्यक्रमासाठी गेले होते. पुस्तक प्रकाशन कार्यक्रम सुरू असताना आणि कॅबिनेट बैठक संपल्यावर थोड्या वेळातच ही भेट रद्द झाल्याची माहिती समोर आली. त्यामुळे राज्यपालांबरोबर सरकारी नेत्यांची बैठक झाली नाही पण या बैठकीची चर्चा मात्र झाली.