मुंबई : माजी गृहमंत्री अनिल देशमुख यांचे ज्येष्ठ पुत्र सलील देशमुख यांना मुंबई सत्र न्यायालयानं तात्पुरता दिलासा दिला आहे. त्यांचा विनंती अर्ज मान्य करत कोर्टासमोर हजर राहण्यासाठी त्यांना ४ आठवड्यांची परवानगी कोर्टानं दिली आहे. (Court grants interim relief to Anil Deshmukh son Salil Deshmukh in ED Case)

अनिल देशमुख यांच्याविरोधात ईडीनं जो Enforcement Case Information Report (ECIR नोंदवला आहे. त्यात अनिल देशमुख यांच्यासह त्यांचे कुटुंबीय देखील आरोपी दाखवण्यात आले आहेत. यामध्ये त्यांचे ज्येष्ठ पुत्र सलील हे आरोपी क्रमांक १७ आहेत. तपास यंत्रणेनं याप्रकरणी चौकशीसाठी वारंवार सलील यांना समन्स बजावलं होतं. पण ते कधीही आपला जबाब नोंदवायला तपास यंत्रणांसमोर हजर झालेले नाहीत.

त्यानंतर जेव्हा हे प्रकरण कोर्टात गेलं तेव्हा कोर्टानं देखील त्यांना दोन वेळा कोर्टात हजर राहण्याचे आदेश दिले होते. तिसऱ्या समन्सनंतर वॉरंट निघण्याची शक्यता असल्यानं त्यांनी आपल्या वकिलांमार्फत कोर्टात विनंती अर्ज सादर करत कोर्टात हजर राहण्यासाठी मुदत मागितली. कोर्टानं त्यांचा हा विनंती अर्ज मान्य करत चार आठवड्यांची मुदत दिली आहे.