डोंबिवली ः महिलांचा विशेष आवडीचा वटपौर्णिमेचा सण अवघ्या काही दिवसांवर येऊन ठेपला आहे, मात्र यंदा कोरोनाच्या संकटामुळे वडाच्या झाडाच्या शोधात न जाता घरीच वडाचे चित्र काढून त्याचे पूजन करण्याचा निर्णय बहुतांश सुवासिनींनी घेतला आहे. त्यामुळे दरवर्षी असंख्य वडाच्या झाडांच्या होणाऱ्या कत्तलीला आळा बसणार आहे. 

कोरोना वॉर्डातून मिळाला डिशचार्ज, घरी आलेत आणि अवघ्या चार तासात....

वटपौर्णिमेचे वेध लागताच उरल्यासुरल्या वडांच्या झाडांची कत्तल करून त्याच्या फांद्या विक्रीसाठी बाजारात आणल्या जातात. या फांद्याचे पूजन महिला करतात. सध्या मात्र कोरोनाचे संकट असल्यामुळे महिलांनी एकत्र येत घराबाहेर पडून वटपौर्णिमा साजरी करणे धोक्याचे आहे. एकत्रित सण साजरा केल्याने कोरोनाचा धोका संभवतो. या पार्श्वभूमीवर महिलांनी स्वतःचे आणि कुटुंबाचे आरोग्य लक्षात घेऊन घरीच वडाचे चित्र काढून त्याचे पूजन करण्याचे आवाहन पर्यावरणप्रेमींकडून केले जात आहे. त्याला बहुतांश महिलांनी सकारात्मक प्रतिसाद घेत घरीच वटपौर्णिमा साजरी करण्याचा निर्णय घेतला आहे. वडाच्या झाडाखाली महिलांनी गर्दी केली, तर सोशल डिस्टनसिंग पाळणे कठीण होईल. त्यामुळे वडाचे चित्र काढून घरीच वटपौर्णिमा साजरी करावी, असे मत ज्येष्ठ खगोलशास्त्रज्ञ दा. कृ. सोमण यांनी व्यक्त केले आहे. 

सर्वात मोठी बातमी - कोरोना रुग्णांना उपचार देण्याबाबत झाला 'मोठा' निर्णय...

कोरोनाचा प्रादुर्भाव पाहता घरात वडाचे चित्र काढून त्याचे पूजन करण्याचा निर्णय आम्ही सर्व मैत्रिणींनी घेतला आहे. त्यानिमित्ताने दुर्मिळ होत चाललेले वडाचे झाड कसे असते? हे घरातील लहानग्यांनाही समजेल. 
- श्रुती देसले, गृहिणी

सध्या वटपौर्णिमा साजरी करताना महिलांनी सर्व कुटुंबियांच्या आरोग्याचाही विचार केला पाहिजे.  वडाचे एक झाड 20 लोकांना पुरेल एवढा प्राणवायू देते. तर 25 किलो कार्बन डायऑक्साईड शोषून घेते.  त्यामुळे झाडांची कत्तल करून सण साजरा करण्यापेक्षा घरीच वडाचे चित्र रेखाटून पूजन करणे योग्य राहील.
- डॉ. सूर्यकांत येरागी, ज्येष्ठ पर्यावरणतज्ज्ञ