मुंबई : माजी गृहमंत्री अनिल देशमुख यांनी किंवा त्यांच्या सहकाऱ्यांनी मला कुठल्याही हॉटेल किंवा बारमालकाकडून खंडणी वसूल करण्यास सांगितले नव्हते, असा जबाब बडतर्फ पोलिस अधिकारी सचिन वाझे याने आज (ता. १४) चांदीवाल आयोगापुढे दिला.

खंडणी वसुलीच्या प्रकरणात आज बडतर्फ पोलिस निरीक्षक अधिकारी सचिन वाझे याला मंगळवारी निवृत्त न्यायाधीश के. यू. चांदीवाल यांच्या आयोगापुढे हजर करण्यात आले. यावेळी वाझे याने माजी पोलिस आयुक्त परमबीरसिंग यांनी माजी गृहमंत्री अनिल देशमुख यांच्यावर केलेले आरोप फेटाळले.

देशमुख यांचे वकील ॲड. गिरीश कुलकर्णी यांनी त्याची उलटतपासणी घेतली. देशमुख आणि त्यांच्या कर्मचाऱ्यांनी मला कधीही खंडणी वसूल करण्याबाबत सांगितले नाही. शहरातील कोणत्याही बार मालकांकडून किंवा त्यांच्या संबंधित लोकांकडून मी पैसे घेतले नाहीत, अशी कबुली त्याने दिली. मी करत असलेल्या तपासात गृह मंत्रालय किंवा कोणत्याही राजकीय व्यक्तीने हस्तक्षेप केला नाही आणि पैशाची ऑफरही दिली नाही, अशी माहिती वाझेने जबाबात दिली. या प्रकरणावरील पुढील सुनावणी २१ डिसेंबरला होणार आहे.

देशमुख २७ पर्यंत न्यायालयीन कोठडीत

माजी पोलिस आयुक्त परमबीरसिंग यांनी केलेल्या शंभर कोटी रुपयांच्या खंडणीवसुली प्रकरणात माजी गृहमंत्री अनिल देशमुख यांना २७ डिसेंबरपर्यंत न्यायालयीन कोठडीत ठेवण्याचे आदेश आज विशेष न्यायालयाने दिले. परमबीर सिंग यांनी तत्कालीन गृहमंत्री देशमुख यांच्यावर शंभर कोटींच्या खंडणीचे आरोप केले होते.