मुंबई: राज्यपाल भगतसिंह कोश्‍यारी हे महाराष्ट्रात, राजभवनात चांगले रमले आहेत. अनेक कामे करता करता पक्षकार्यही करत आहेत. त्यांनी उत्तराखंडला परत जाऊ नये, अशी आमची इच्छा आहे; पण त्यांना जायचेच असेल, तर १२ आमदारांच्या फाईलवर सही करून जावे. थोडे पुण्य पदरात पडेल, असा चिमटा शिवसेना नेते संजय राऊत यांनी काढला.

उत्तराखंड राज्याची विधानसभा निवडणूक पुढील काही महिन्यात होणार आहे. त्या पार्श्‍वभूमीवर कोश्‍यारी यांनी पुन्हा उत्तराखंडात जाऊन पक्षासाठी काम करण्याची इच्छा नेतृत्वाकडे व्यक्त केली असल्याचे समजते. त्याबाबत माध्यमांशी बोलताना संजय राऊत म्हणाले, ‘याबाबत अधिकृतपणे काही माहिती नाही. त्यांनी चांगले काम केले आहे.

राजकरण न करता त्यांनी काम केले असते, तर महाराष्ट्राला त्यांच्या अनुभवाचा फायदा झाला असता. येथील भाजपसोबत त्यांचे चांगले जमले होते; तरीही त्यांना जायचे असेल तर त्यांनी १२ आमदारांच्या फाईलवर सही करून जावे. तेवढेच पुण्य, असे राऊत म्हणाले. महाराष्ट्र आणि त्यांचे अजिबात भांडण नाही. आम्ही त्यांचा आदर करतो, त्यांनीही आमचा आदर करावा, अशी पुष्टीही राऊत यांनी जोडली.