मुंबई: ऑक्सफोर्ड विद्यापीठाने विकसित केलेल्या कोविड -19 बहुप्रतिक्षित लसीच्या चाचणीची शनिवारी दुपारी किंग एडवर्ड मेमोरियल (केईएम) रुग्णालयात सुरूवात झाली. चाचण्यांच्या पहिल्याच दिवशी 20 ते 45 वयोगटातील तीन स्वयंसेवकांना दुसऱ्या टप्प्यातील मानवी चाचण्यांचा भाग म्हणून इंट्रामस्क्युलर डोस दिला गेला.

सूत्रांनी दिलेल्या माहितीनुसार, तीन निरोगी स्वयंसेवकांपैकी दोन उद्योजक आहेत, तर त्यातील एक सरकारी संस्थेतील संशोधक आहे. दरम्यान, रुग्णालयाच्या प्रशासनाने गोपनीयतेचे कारण सांगून स्वयंसेवकांची ओळख जाहीर करण्यास नकार दिला आहे. 

केईएम रूग्णालयाचे अधिष्ठाता डॉ. हेमंत देशमुख म्हणाले की तिन्ही स्वयंसेवक सुदृढ आहेत आणि त्यांच्यात कोणत्याही कोमॉरबिडीज किंवा कोणताही वैद्यकीय इतिहास नाही. ते कोरोना व्हायरसच्या संपर्कात आले आहेत का हे तपासण्यासाठी आरटी-पीसीआर आणि अँटीबॉडी चाचण्या केल्या गेल्या आहेत. 

अधिक वाचाः  आधीच कंगाल असलेली 'बेस्ट' मंत्र्यांवर मात्र मेहरबान; चार ते पाच महिन्यांपासून वीज बिल नाही

ते म्हणाले, “आम्ही शनिवारी दुपारी तीन स्वयंसेवकांना पहिला डोस दिला, त्यानंतर त्या सर्वांना लसीकरणानंतर एक तासासाठी निरीक्षणाखाली ठेवले आणि नंतर घरी जाण्याची परवानगी दिली. दुसर्‍या टप्प्यात आम्ही त्याच्या सुरक्षेचे निरीक्षण करण्याचा प्रयत्न करू. इंजेक्शननंतर ताप, मळमळ, चक्कर येणे किंवा लालसरपणा आणि सूज यासारखे दुष्परिणाम दिसले तर त्याचे ही आकलन केले जाईल असे डॉ. देशमुख म्हणाले.

अधिक वाचाः  मुंबईतील पिण्याचे पाणी सर्वाधिक शुद्ध; BMC चा पर्यावरण स्थितीदर्शक अहवाल प्रसिद्ध

रुग्णालयाने प्रक्रियेसाठी आणखी 20 स्वयंसेवकांची निवड केली आहे. इंडियन कौन्सिल ऑफ मेडिकल रिसर्चच्या (आयसीएमआर) नुसार प्रत्येक स्वयंसेवक चाचणीच्या काळात होणाऱ्या दुष्परिणामांमुळे मरण पावला तर त्यांना एक कोटी जीवन विम्याचे संरक्षण देण्यात आले आहे. तसेच, लसीकरणामुळे काही विपरीत परिणाम झाल्यास त्यांच्याकडे वैद्यकीय विमा 50 लाख रुपये देण्यात आला आहे.

दरम्यान, सोमवारी तीन महिला स्वयंसेवकांना बीवायएल नायर रुग्णालयात कोविड 19 लसीचा पहिला डोस देण्याची शक्यता आहे.

-------------------

(संपादनः पूजा विचारे) 

Dosage of Covishield vaccine successfully given to 3 volunteers