Mumbai Local Latest Update : डोंबिवली रेल्वे स्थानकात सोमवारी दुपारी ओव्हरहेड वायर मध्ये झालेल्या बिघाडामुळे लोकलचे वेळापत्रक बिघडले. यामुळे कल्याण दिशेकडील जलद मार्गावरील लोकल सुमारे अर्धा तास उशिराने धावत होत्या. फलाट क्रमांक 4 वरील फलाटाचा पत्रा ओव्हरहेड वायरला टच झाल्याने स्पार्क झाले व वायरचा सप्लाय बंद करण्यात आला व त्यामुळे लोकल खोळंबल्याची बाब रेल्वे प्रशासनाच्या निदर्शनास येताच पत्रा हटविण्यात आल्याची माहिती अधिकाऱ्यांनी दिली.

डोंबिवली रेल्वे स्थानकात सोमवारी दुपारी 3.55 च्या दरम्यान हा बिघाड झाल्याचे रेल्वे प्रशासनाच्या वतीने सांगण्यात आले. फलाट क्रमांक 4 वर डोंबिवली ते ठाकुर्ली दरम्यान सेवाग्राम एक्सप्रेस खोळंबली होती. ओव्हरहेड वायरमध्ये तांत्रिक बिघाड झाल्याने 3.58 ची बदलापूरला जाणारी लोकल फलाटावरच उभी होती. त्याविषयी रेल्वे प्रशासनाकडून फलाटावर उद्घोषणा देखील करण्यात येत होती.

फलाट 4 वर कल्याण दिशेकडील फलाटाचा पत्रा सरकून तो ओव्हरहेड वायरला टच झाला. यावेळी स्पार्क झाल्याने त्या वायरचा पॉवर सप्लाय बंद करण्यात आला. यामुळे लोकल जागेवरच खोळंबल्या. रेल्वे प्रशासनाने त्वरित हा पत्रा काढून ओव्हरहेड वायरचा सप्लाय पूर्ववत केल्याची माहिती रेल्वे अधिकाऱ्यांनी दिली. त्यानंतर लोकल सुरू झाल्या. मात्र यामुळे सुमारे अर्धा तास लोकल उशिराने धावत होत्या. तर मुंबईकडे जाणाऱ्या लोकल देखील 15 मिनिटे उशिराने धावत होत्या.