मुंबई : मुंबईतील उपनगर असलेल्या मीरा रोडमध्ये एक धक्कादायक घटना घडली आहे. या घटनेनंतर आपण मुंबई राहतो की UP मध्ये असा प्रश्न अनेकांना पडलाय. दिवसाढवळ्या चार माणसं हातात हत्यारे घेऊन येतात काय आणि बंदुकीच्या धाकाने दागिन्यांचं संपूर्ण दुकान लुटतात काय. सर्वच एकदम फिल्मी मात्र तेवढंच भयावह. 

मीरा रोडमधील एस कुमार सोने आणि हिऱ्यांच्या दुकानात दिवसाढवळ्या सशस्त्र दरोडा पडलाय. यामध्ये या दुकानातून चोरटयांनी तब्बल दोन कोटी रुपयांचं सोनं नाणं आणि हिरे लुटून नेले आहेत. हा सगळा भीषण प्रकार CCTV  कॅमेऱ्यामध्ये कैद झालाय. 

हेही वाचा- मुंबईत आज राजावाडी, कूपर आणि बीकेसीत लसीकरणासाठी ड्राय रन

मीरा रोडमधील पोलिस उपायुक्त अमित काळे यांच्या माहितीनुसार चार दरोडेखोर बाईकने दुपारी दोन वाजताच्या सुमारास दुकानात आलेत. दुकानात गेल्यावर आपल्या बॅगा काढेपर्यंत दुकानामधील सेल्समनला त्यांनी बोलण्यात गुंतवून ठेवलं. यानंतर घडली धक्कादायक घटना. या चार अज्ञात व्यक्तींपैकी एका व्यक्तीने थेट रोव्हॉल्व्हर काढून मालकाच्या कानपट्टीवर ठेवली. यानंतर इतरांनीही  रिव्हॉल्व्हर काढून दुकानातील काम करणाऱ्यांवर रोखली आणि संपूर्ण दुकान लुटलं. दुकान लुटून हे चारही अज्ञात तिथून पसार झालेत.  

दरम्यान, पोलिसांकडून या चार अज्ञांतांच्या विरोधात दरोड्याचा गुन्हा दाखल केला आहे. मीरा रोड पोलिस याबाबत पुढील तपास करत आहेत. 

मुंबई विभागातल्या ताज्या बातम्या वाचण्यासाठी येथे क्लिक करा

four armed men looted jewelry shop in mira road police investigation underway