नवी मुंबई : कोपरखैरणेतील बोनकोडे गावातील समता नगर भागात बेकायदा वास्तव्यास असलेल्या चार बांगलादेशी महिला व त्यांच्या 3 अल्पवयीन मुलींना मुंबई पोलिसांच्या विशेष शाखेने मंगळवारी (ता.4) पहाटे अटक केली. या कारवाईत पकडण्यात आलेल्या सर्व बांगलादेशी महिला या बांधकाम साईटवर, तसेच घरकाम करून राहत असल्याचे तपासात आढळून आले. 

ही बातमी वाचली का? त्या आदिवासी दांम्पत्याला घराची लॉटरी

कोपरखैरणे भागात काही बांगलादेशी नागरिक बेकायदा वास्तव्यास असल्याची माहिती मुंबई पोलिसांच्या गुन्हे अन्वेषण विभागाच्या विशेष शाखेला मिळाली होती. त्यानुसार गुन्हे अन्वेषण विभागाचे पोलिस निरीक्षक बेले व त्यांच्या पथकाने मंगळवारी पहाटे कोपरखैरणे पोलिसांच्या मदतीने कोपरखैरणेतील बोनकोडे गावातील समता नगर येथील गोदाबाई निवास इमारतीतील 503 क्रमांकाच्या संशयित घरावर छापा मारला. यावेळी या घरात यास्मिन मुमताज शेख (45) व तिची 17 वर्षीय मुलगी, त्याचप्रमाणे राबिया अनिस शेख (35) व तिच्या दोन अल्पवयीन मुली राहत असल्याचे आढळून आले. त्यामुळे पोलिसांनी या सर्वांना ताब्यात घेतले. 

ही बातमी वाचली का? विमानतळ प्रकल्पाग्रस्तांवर लाठीचार्ज

त्यानंतर पोलिसांनी त्याच भागातील 787 क्रमांकाच्या घरावर छापा मारून त्याठिकाणी राहणाऱ्या अमिना मोहम्मद मिर्झा (30), गोले मोहम्मद इमाम शेख (30) या दोन्ही महिलांना ताब्यात घेतले. कोपरखैरणे पोलिसांनी या महिलांकडे त्यांच्या मूळ गावाबाबत विचारणा केली असता, त्यांनी सुरुवातीला उडवाउडवीची उत्तरे दिली. मात्र, पोलिसांच्या दबावानंतर त्यांनी बांगलादेशातील उपासमारीला कंटाळून बेकायदा भारतात प्रवेश केल्याची कबुली दिली. तसेच त्यांनी अधूनमधून आपल्या मूळ गावी जात-येत असल्याचेही सांगितले. त्यानुसार मुंबई पोलिसांच्या विशेष शाखेने चारही महिलांवर कोपरखैरणे पोलिस ठाण्यात पारपत्र अधिनियम 1920 नुसार गुन्हा दाखल करून त्यांना अटक केली.