कल्याण : कल्याण-डोंबिवली महापालिकेची स्मार्ट सिटीमध्ये निवड होऊन चार वर्षे होत आहेत; मात्र अद्याप एकही काम पूर्ण झाले नाही. त्यामुळे केवळ स्मार्ट सिटीच्या चर्चेचे गुऱ्हाळ चालत असून प्रत्यक्ष विकास कधी दिसणार, असा सवाल केला जात आहे. 

कल्याण-डोंबिवली महापालिकेचा स्मार्ट सिटी प्रकल्पात सन 2016 मध्ये समावेश झाला. 24 प्रकल्पांची यादी तयार करण्यात आली. यात अनेक कामांची घोषणा झाली असली, तरी केवळ चार वर्षांत सिटी पार्क आणि पालिका मुख्यालयामध्ये सिग्नल आणि सीसीटीव्ही कॅमेरा कंट्रोल रूमच्या कामाला सुरुवात झाली आहे. कल्याण डोंबिवली महापालिकेने स्मार्ट सिटीचा 1 हजार 445 कोटीचा प्रकल्प प्रस्ताव सादर केला होता. त्याला सन 2016 मध्ये सरकारने मंजुरी दिली.

ही बातमी वाचा ः बलात्कारात मदत करणाराही तेवढाच दोषी

स्मार्ट सिटीच्या अंतर्गत एरिया बेस व पॅन सिटी या दोन प्रकारांत करण्यात येणाऱ्या विकास प्रकल्पांपैकी केवळ सिटी पार्कच्या कामाला सुरुवात झालेली आहे. सिटी पार्कप्रमाणेच स्मार्ट सिटीअंतर्गत कल्याण रेल्वेस्थानक परिसराचा विकास करण्याचा महत्त्वाकांक्षी प्रकल्प आहे. याला कोट्यवधी रुपये खर्च होणार असून निविदा आणि पुढील चर्चेमध्ये गाडी थांबली आहे. हा प्रकल्प पूर्ण करण्यासाठी सरकारची 2022 ची मुदत असून तो राज्य शासनाकडून रद्द होतो का, अशी चर्चा ही रंगली होती. 

निवडणूक सत्ताधाऱ्यांना डोकेदुखी ठरणार 
स्मार्ट सिटीमध्ये पाच वर्षांत एक हजार कोटी रुपयांची कामे होणे अपेक्षित होते. त्यासाठी पालिकेने दर वर्षी 50 कोटी रुपयांची आर्थिक तरतूद अथवा जमा दाखविणे अपेक्षित आहे. वाहतूक कोंडी दूर होणे, शहरातील सुरक्षा, पाणीसमस्या, कचराप्रश्न सोडविणे आदी कामे स्मार्ट सिटीमध्ये आखली असली तरी केवळ चर्चा आणि बैठकांमध्ये स्मार्ट सिटीचे गाडे अडले आहे. नवीन वर्षात 2020 मध्ये स्मार्ट सिटीमधील एक प्रकल्प तरी नागरिकांना मिळेल का, असा सवाल केला जात आहे. यावर्षी ऑक्‍टोबर महिन्यात पालिकेच्या पंचवार्षिक निवडणुका होणार असून सत्ताधारी पक्षांना डोकेदुखी ठरणार आहे.