मुंबई : मुंबईतील बीकेसी परिसरात रस्त्याच्या विरुद्ध दिशेने येणाऱ्या एका चारचाकीने अन्य एका चारचाकी गाडीला धडक दिल्यामुळे भीषण अपघात झाला. या अपघातात स्वाती चौधरी नावे साडेतीन वर्षांच्या मुलीचा मृत्यू झाला असून अन्य दोन व्यक्ती गंभीर जखमी झाले आहेत.

ओम चौधरी आणि त्यांचे मित्र विनोद यादव हे दोघे गंभीर जखमी झाले असून दोघांनाही गुरु नानक रुग्णालयात दाखल करण्यात आले आहे. बुधवारी 8 मार्चला संध्याकाळी 5 च्या सुमारास ही घटना घडली. दरम्यान, विश्वास अट्टावर आरोपी चालकाचं नाव असून पोलीसांनी त्याला अटक केली आहे. तसेच गाडी चालवताना तो मद्यधुंद अवस्थेत असल्याचे माहिती पोलिसांकडून देण्यात आली आहे.

आरोपी चालकाने बुधवारी संध्याकाळी बीकेसी पोलीस ठाण्यापासून अगदी हाकेच्या अंतरावर असलेल्या ट्रॅफिक सिग्नलजवळ एक ऑटोरिक्षासह पादचाऱ्याला धडक दिली. त्यानंतर तिथून वेगाने पळ काढताना त्याने हॉटेल ट्रायडन्ट येथील मार्गावरून विरुद्ध दिशेने जात समोरून येणाऱ्या एका कारला धडक दिली.

या भीषण अपघातात स्वाती चौधरी नावाच्या एका साडेतीन वर्षाच्या मुलीचा जागीच मृत्यू झाला. तर तिचे काका ओम चौधरी (25) आणि त्यांचे मित्र विनोद यादव (46) हे दोघे गंभीर जखमी झाले आहेत. दोघांनाही गुरु नानक रुग्णालयात दाखल करण्यात आले आहे.

याप्रकरणी पोलिसांनी आरोपी गाडी चालकाला ताब्यात घेतले असून त्याच्याविरोधात भादंवि आणि मोटार वाहन कायद्यांतर्गत गुन्हा दाखल केला आहे. तसेच अपघातादरम्यान आरोपी चालक मद्यधुंद अवस्थेत होता, अशी माहितीही पोलिसांकडून देण्यात आली आहे. दरम्यान, आरोपी चालकाला न्यायालयापुढे हजर केले असता न्यायालयाने त्याला 50 हजाराच्या जात मुचलक्यावर जामीन मंजूर केला.