खारघर : मुंबई, ठाणे आणि कल्याण येथील कारागृहात कैद्यांसाठी जागा अपुरी पडू लागल्याने महाराष्ट्र शासनाने २००५ मध्ये  तळोजा येथे दोन हजार कैद्यांसाठी कारागृह उभारले. तसेच कारागृहात काम करणाऱ्या कर्मचारी वर्गासाठी पंधरा इमारती उभारल्या असून त्यातील सात इमारतींचे बांधकाम निकृष्ट दर्जाचे असल्याने दहा वर्षांतच इमारतीला गळती लागली. बुधवारी (ता.८) वसाहतीतील एका घराचा स्लॅब कोसळल्याने कर्मचाऱ्यांच्या सुरक्षेसाठी घरे रिकामी करण्याचा आदेश सार्वजनिक बांधकाम विभागाने दिला आहे. त्यामुळे वसाहतीत राहणाऱ्या कर्मचाऱ्यांचे कुटुंब रस्त्यावर आले आहे. 

विनयभंग प्रकरणी डीआयजी निशिकांत मोरे निलंबीत 

दहा वर्षांतच गळती लागलेल्या इमारतींची दुरुस्ती करावी, याबाबत कारागृह प्रशासनाने सार्वजनिक बांधकाम विभागाकडे पत्रव्यवहार केला होता; मात्र प्रशासनाने दुर्लक्ष केल्यामुळे बुधवारी सकाळी पाचच्या सुमारास इमारत क्रमांक तीनमध्ये वास्तव्य करणाऱ्या पोलिस शिपाई जगदीश सोळंखी यांच्या अंगावर इमारतीचा स्लॅब कोसळल्याने ते गंभीर जखमी झाले. त्यामुळे खडबडून जाग्या झालेल्या बांधकाम विभागाने तळोजा कारागृहातील धोकादायक इमारत रिकामी करा, असे पत्र सार्वजनिक बांधकाम विभागाने कारागृह विभागाला पाठविले आहे.

तळोजा कारागृहात स्लॅब कोसळून गंभीर जखमी झाल्याची माहिती मिळताच कोकण भवन सार्वजनिक बांधकाम विभागाने गुरुवारी (ता.९) तळोजा कारागृह प्रशासनास पत्र पाठवून इमारती रिकाम्या कराव्यात, असे पत्र पाठविले. त्यामुळे ऐनवेळी मुलाबाळांसह कुठे वास्तव्य करावे, असा प्रश्‍न कर्मचाऱ्यांना पडला आहे. याबाबत तळोजा कारागृहाचे तुरुंग अधीक्षक कौस्तुभ कुरलेकर यांच्याशी संपर्क साधला असता होऊ 
शकला नाही. 

स्लॅब कोसळल्‍याने पोलिस शिपाई जखमी
तळोजा कारागृहातील सरकारी वसाहतीच्या इमारतीचा स्लॅब कोसळल्याने पोलिस शिपाई गंभीर जखमी झाल्याची घटना बुधवारी (ता.८) पहाटे ५.३० वाजता घडली. जगदीश सोळंखी असे या पोलिस शिपायाचे नाव आहे. त्यांच्यावर वाशी पालिका रुग्णालयात उपचार सुरू आहेत. तळोजा कारागृहाच्या मागील बाजूस सार्वजनिक बांधकाम विभागाने उभारलेल्या शासकीय वसाहती आहेत. या ठिकाणच्या १५ इमारतींपैकी ७ इमारतींची अवस्था अत्यंत बिकट झाली आहे. यापैकी बिल्डिंग क्रमांक ३ मधील रूम नं.२ मध्ये ही घटना घडली. पहाटे ५.३० च्या सुमारास गाढ झोपेत असताना अचानकपणाने जगदीश सोळंखी यांच्या अंगावर स्लॅब कोसळले. स्लॅबचा मोठा भाग अंगावर पडल्याने त्यांना गंभीर दुखापत झाली. आरडाओरडा केल्यांनतर आजूबाजूच्या घरातील कर्मचाऱ्यांनी सोळंखी यांच्या घराकडे धाव घेत त्यांना तात्काळ कारागृहातील रुग्णालयात दाखल केले. दरम्यान, कारागृहातील डॉक्‍टरांनी जखमी कर्मचाऱ्याला त्वरित वाशी येथील पालिकेच्या रुग्णालयात हलविण्यास सांगितले.