मुंबई : उसने घेतलेले पैसे परत न दिल्यामुळे एअर इंडियातील एका अभियंत्याचे गुजरातला अपहरण करून हत्या केल्याचे उघड झाले आहे. या प्रकरणी पोलिसांच्या गुन्हे शाखेने त्रिकुटाला अटक केली असून, अधिक तपास सुरू आहे. 

एअर इंडियात अभियंता असलेले दीपक अमृतलाल पांचाळ (59) यांच्या हत्येप्रकरणी गुन्हे शाखेच्या युनिट क्र. 10 च्या पथकाने जयंतीभाई बाबुलालभाई पटेल (64), गोपाळ ऊर्फ करण लिलाभाई परमार (27) आणि राजूभाई आगठ (35) यांना अटक केली. 19 सप्टेंबरला सकाळी घरातून बाहेर पडलेले पांचाळ परत आले नाहीत. या प्रकरणाची माहिती मिळाल्यानंतर अंधेरी पोलिसांनी गुन्हा दाखल करून त्यांचा शोध सुरू केला. गुन्हे शाखेच्या युनिट क्र. 10 ने समांतर तपास हाती घेतला; परंतु पांचाळ यांचा ठावठिकाणा लागत नव्हता. 

एकदा पाहा तर :  करीनाचे साडीतले हे फोटो पाहिलेत का? यावर आहे 'हटके' काही..

गोधडीत गुंडाळलेला मृतदेह सिमेंटच्या खांबाला बांधून ठेवला

दरम्यान, गुजरात येथील ब्राम्हणी डॅम-2, तालुका हलवद, जिल्हा मोरबी येथे सिमेंटच्या खांबाला बांधून गोधडीत गुंडाळलेला मृतदेह सापडला होता. हा मृतदेह बेपत्ता असलेले पांचाळ यांचा असल्याचे उघड झाले. या प्रकरणाचा तपास करत असलेल्या गुन्हे शाखेच्या युनिट क्र. 10 ने या गुन्ह्याची माहिती असलेल्या एका व्यक्तीला शोधून काढले. त्याने दिलेल्या माहितीवरून पोलिसांनी दिल्ली, अहमदाबाद, राजकोट, मोरबी, जुनागड या ठिकाणी शोध घेऊन तीन संशयित आरोपींना पकडले. पैशांच्या वादातून पांचाळ यांचे अपहरण करून हत्या केल्याची कबुली त्यांनी दिली. 

एकदा पाहा तर :  PHOTO : महाराष्ट्राच्या मुख्यमंत्र्यांनी सहकुटुंब घेतली शरद पवारांची भेट..

गुन्हे शाखेची कामगिरी : 

आरोपींनी दीपक पांचाळ यांचे मुंबईतून अपहरण करून त्यांना गुजरातमध्ये नेले. तेथे त्यांची हत्या केली व गुन्हा लपवण्यासाठी ब्राम्हणी डॅम-2 येथे मृतदेहाची विल्हेवाट लावली. गुन्हे शाखेच्या युनिट क्र. 10 चे प्रभारी पोलिस निरीक्षक सुनील माने, सहायक निरीक्षक धनराज चौधरी, मोहन घाणेकर, राजेश मोरे, अविनाश चिकणे, अजित पाटील यांच्या पथकाने अथक परिश्रम घेऊन हा गुन्हा उघडकीस आणला. 

WebTitle : horrible air india engineer kidnapped for not repaying his debt