मुंबई: एका सायबर गुन्हेगाराने (cyber fraudster) युकेचा (UK) नागरिक असल्याचे भासवून अंधेरीत राहणाऱ्या ३४ वर्षीय महिलेसोबत मैत्री (friendship with women) केली. तिचा विश्वास संपादन केला. नंतर तिची फसवणूक (Cheat) केली. अंधेरी पोलीस ठाण्यात या प्रकरणी एफआयआर नोंदवण्यात आला आहे. एका व्यक्तीने मला इन्स्टाग्रामवरुन फॉलोची रिक्वेस्ट पाठवली होती. तो लंडनमध्ये राहत असल्याचा त्याने दावा केला होता.

मैत्री झाल्यानंतर तिने त्याला आपला फोन नंबर दिला व त्याच्यासोबत चॅटिंग सुरु केले. २७ जुलैला त्या घोटाळेबाजाने महिलेला इंटरनॅशनल नंबरवरुन फोन करुन कार्गो शिपिंगने काही भेटवस्तू पाठवत असल्याचे सांगितले. तिला भेटवस्तुंचे फोटो देखील पाठवले. डिलिव्हरी ट्रॅक करण्यासाठी तिला लिंकही पाठवली.

२९ जुलैला महिलेला एका फोन आला. फोन करणाऱ्याने तो कस्टममधुन बोलत असल्याचे सांगितले. तुम्हाला गिफ्ट आले असून त्यात भरपूर रोकड असल्याचे त्याने सांगितले. तुम्हाला ते गिफ्ट पार्सल मिळवण्यासाठी एक प्रमाणपत्र घ्यावे लागेल, त्यासाठी काही रक्कम भरावी लागेल असे सांगितले. तक्रारदार महिलेने गिफ्ट मिळवण्यासाठी ४.२९ लाख रुपये भरले.

दुसऱ्या दिवशी त्या महिलेला आणखी एक फोन कॉल आला. समोरच्या व्यक्तीने इन्कम टॅक्स अधिकारी बोलत असल्याचे सांगून गिफ्टवर करापोटी ५.६९ लाख रुपये भरायला सांगितले. महिलेने पैसे भरण्यास नकार दिला व स्वत:ची ओळख सिद्ध करायला सांगितले. घोटाळेबाजाने तो फोन कॉल कट केला. त्यावेळी महिलेला आपली फसवणूक झाल्याचे लक्षात आले.