खोपोली, : साजगाव-ढेकू औद्योगिक क्षेत्रातील मे. जष्णोवा फार्मा कंपनीत गुरुवारी सकाळी झालेल्या स्फोटात दोघांना जीव गमवावा लागला. या घटनेनंतर खालापूर औद्योगिक क्षेत्रातील सुरक्षेचा प्रश्‍न पुन्हा ऐरणीवर आला आहे. गेल्या चार वर्षांतील आग आणि स्फोटाच्या 23 घटनांत तालुक्‍यात 22 जणांचा मृत्यू झाला आहे. 

हे वाचा : दिवाळीत फटके फोडाल तर तुरूंगात जाणार

खोपोली शहर परिसर आणि खालापूर तालुक्‍याची ओळख औद्योगिक दृष्ट्या आघाडीवर असलेले क्षेत्र म्हणून आहे. पोलाद, रासायनिक, प्लास्टिक, औषधे, खाद्य तेलासह विविध प्रकारचे उत्पादन, प्रक्रिया करणाऱ्या कंपन्या येथे आहेत, परंतु दर चार ते सहा महिन्यांत येथील कोणत्या ना कोणत्या कंपनीत आग, मोठ्या अपघातांच्या घटना घडतात. त्यानंतर संबंधित शासकीय अधिकारी, लोकप्रतिनिधी पाहणी दौरा करतात. चौकशी आणि सुरक्षेबाबत कडक अंमलबजावणीचे आश्‍वासन देतात, परंतु ठोस उपाययोजना होत नसल्याचे वास्तव आहे. 

हे वाचा : तुम्ही आधी निट उभे राहा; अर्णब यांना सुनावले

औद्योगिक क्षेत्रात आग किंवा स्फोट रोखण्यासाठी कोणतीही उपाययोजना नसल्याचे स्पष्ट झाले आहे. रायगड औद्योगिक सुरक्षा विभाग, प्रदूषण नियंत्रण मंडळ, स्थानिक प्रशासन नियमितपणे कोणती तपासणी करतात असा प्रश्‍नच आहे. 
 

खालापूर तालुक्‍यातील औद्योगिक सुरक्षेबाबत कोणतीही उपाययोजना होत नाही. अनेक कंपन्यांकडे दुर्घटना नियंत्रणासाठी कोणतीही सुविधा नाही. तक्रारी केल्यावर तपासणीच्या नावावर संबंधित अधिकारी त्यांचे हित पाहतात. 
- नरेंद्र गायकवाड, रिपब्लिकन पक्ष 
.... 
खालापूर तालुक्‍यातील औद्योगिक सुरक्षेसंबंधात कोणतीही तडजोड व त्रुटी राहू नये यासाठी संबंधित विभागाला सूचना देण्यात आली आहे. स्थानिक महसूल अधिकारी, स्थानिक स्वराज्य संस्थांचे अधिकारीही वेळोवेळी पाहणी करून आढावा घेतील. 
- इरेश चप्पलवार, तहसीलदार, खालापूर