डोंबिवली: कल्याण डोंबिवली शहरात गेल्या काही दिवसांपासून कोरोना विषाणूची लागण झालेल्या रुग्णांची संख्या वाढत आहे. या पार्श्वभूमीवर कल्याण डोंबिवली महानगरपालिकेचे आयुक्त डॉ. विजय सूर्यवंशी यांनी समाजमाध्यमावर शहरातील नागरिकांना एका व्हिडीओच्या माध्यमातून संबोधित केले. मात्र मराठमोळ्या कल्याण डोंबिवली शहरात सुर्यवंशी यांनी हिंदीतुन आपले विचार मांडल्यामुळे नागरिकांनी या व्हिडिओला ट्रोल करत आपले संतापजनक मतं व्यक्त केले आहे.

ऐतिहासिक कल्याण शहर आणि सांस्कृतिक उपराजधानी  असलेल्या डोंबिवली शहरात सुशिक्षित मध्यमवर्गीय मराठी भाषिक नागरिक मोठ्या संख्येने राहतात. येथे सर्व मराठमोळे  सणही पारंपरिक पद्धतीने अजूनही साजरे केले जात आहे. मात्र, समाजमाध्यमावर डोंबिवली पूर्व परिसरात पाच कोरोनाबाधित रुग्ण आढळल्याने या ठिकाणी आगमन - प्रस्थान करण्यास प्रतिबंध घालण्यात आला असून याबाबतची  संपूर्ण माहिती आयुक्तांनी  बुधवारी  सकाळी एका व्हिडिओच्या माध्यमातून नागरिकांना दिली.  
ही माहिती आयुक्तांनी हिंदी भाषेतून दिल्यामुळे कल्याण डोंबिवली करांनी तीव्र नाराजी व्यक्त करत समाजमाध्यमावरच आयुक्तांना खडे बोल सुनावले आहेत.

सूर्यवंशी हे  आयुक्तपदी  रुजू झाल्यापासून अल्पावधीतच त्यांनी आपल्या कामाचा ठसा उमटवला आहे. मात्र, हिंदीला प्राधान्य दिल्यामुळे हा व्हिडीओ  सोशल मीडियावर चर्चेचा विषय ठरला आहे. याबाबत आयुक्त डॉ विजय सूर्यवंशी यांना विचारले असता  शहरात विविध  भाषिक लोकसंख्या असून, मराठी भाषेतील व्हिडीओही लवकर अपलोड करण्यात येईल, असे स्पष्ट केले.