डोंबिवली : कल्याण डोंबिवली महापालिकेने 27 गावातील मालमत्ता करात अवास्तव वाढ केली आहे. आयुक्तांसोबत वारंवार चर्चा करूनही तोडगा निघत नसल्याने 27 गाव सर्व पक्षिय हक्क सरंक्षण संघर्ष समितीने मंगळवारी पालिका मुख्यालयासमोर मालमत्ता कराच्या बिलांची होळी केली. गावातील नागरिक मालमत्ता कर भरणार नाहीत, पालिका अधिकारी गावात कर वसुलीसाठी आल्यास त्यांच्या सुरक्षिततेची जबाबदारी संपूर्ण त्यांची राहील असा इशारा समितीच्या वतीने देण्यात आला. मनसेनेही समितीच्या आंदोलनास पाठिंबा दिला असून

कल्याण डोंबिवली महापालिकेत 2015 ला 27 गावे समाविष्ट करण्यात आली. मात्र ही गावे महापालिकेतून वगळून त्यांची स्वतंत्र नगरपालिका करावी अशी मागणी संघर्ष समितीची आहे. दोन वर्षांनंतर लागू केलेल्या मालमत्ताकराबाबतही असंतोष निर्माण झाला आहे. मालमत्ता कर हा 10 टक्क्यांनी नाही तर तब्बल 10 पटीने वाढविला आहे. सात वर्षांपासून जी महापालिका 27 गावांत प्राथमिक सोयी-सुविधा देऊ शकत नाही ती महापालिका गावांवर दहापटीने कर कसा आकारू शकते? अवास्तव कराबाबत पालिका आयुक्त डॉ. विजय सूर्यवंशी यांना निवेदन सादर करून जाब विचारला होता.

राज्य सरकारकडेही दाद मागितली होती. त्याकडे दुर्लक्ष झाल्याने आंदोलन छेडण्याची वेळ आल्याचे समितीचे उपाध्यक्ष गुलाब वझे यांनी सांगितले. तसेच कर वसुलीसाठी पालिका अधिकारी यांनी सक्ती केल्यास व गावात वसुलीस आल्यास त्यांच्या सुरक्षिततेची जबाबदारी आमची नाही असा इशारा समिती अध्यक्ष गंगाराम शेलार यांनी दिला. यावेळी अर्जुनबुवा चौधरी, दत्ता वझे, गजानन मंगरूळकर, प्रकाश भोईर, मनोज घरत, ब्रम्हा माळी, तेजस पाटील यांसह अनेक मान्यवर उपस्थित होते.

मालमत्ता कर बिल आकारणी योग्य असल्याची भूमिका महापालिका प्रशासनाकडून घेतली जात आहे. यामुळे संघर्ष समितीच्या वतीने शेकडो नागरिकांसह मालमत्ता कर बिलाची पालिका मुख्यालयासमोर होळी करत महापालिकेचा निषेध करण्यात आला. महापालिकेच्या विरोधात जोरदार घोषणाबाजी करण्यात आली. यानंतर समितीच्या शिष्टमंडळाने पालिका अधिकाऱ्याची भेट घेत निवेदन सादर केले.