मुंबई - विधानसभा अध्यक्षांच्या अनुपस्थितीत त्यांच्या कार्यालयाला राजीनामा सुपूर्द करणारे १० आमदार मुंबईत दाखल झाले आहेत. काँग्रेसचे १० आणि जनता दलाच्या दोन आमदारांनी आज राजीनामे दिले. त्यातील १० जण मुंबईत मुक्‍कामी आहेत. वांद्रे परिसरातील पंचतारांकित हॉटेलमध्ये त्यांना कडेकोट बंदोबस्तात ठेवण्यात आले आहे. महाराष्ट्रात भाजपचे सरकार असल्याने येथे बंडखोर आमदार सुरक्षित असतील, असा विश्‍वास कर्नाटकातील बंडाचे सूत्रधार येडियुराप्पा यांना आहे.

कर्नाटकातील काँग्रेस आणि जनता दलाच्या ११ आमदारांनी राजीनामे देण्याच्या घटनेचा परिणाम स्पष्ट आहे. भाजपने या सर्व घडामोडींबद्दल मौन बाळगले असले, तरी काही दिवसांपासून या मोहिमेला मुंबईतून बळ मिळाले. गेले सात ते आठ महिने बंडखोर कानडी आमदारांचे आदरातिथ्य भाजपमध्ये नव्याने प्रवेशलेला एक नगरसेवक युवा पदाधिकाऱ्यांच्या मदतीने करत असे. काँग्रेसनेही या घडामोडींवर बारीक लक्ष ठेवले होते. मुंबईतील एका पंचतारांकित हॉटेलमध्ये या आमदारांच्या येण्या-जाण्यावर काँग्रेस बारकाईने लक्ष ठेवून असे. कर्नाटकातील काही आमदार भाजपने गळाला लावले असून ते मुंबईत मुक्‍कामाला असल्याची माहिती सर्वप्रथम मुंबईचे माजी अध्यक्ष संजय निरुपम यांनी दिल्लीतील श्रेष्ठींना पाठवली होती. त्यानंतर कर्नाटकातील संकटमोचक शिवकुमार यांनी जद काँग्रेस संयुक्‍त सरकारला तारले होते. आज बाहेर पडलेल्या आमदारांशी भाजपने मुंबई मुक्‍कामात संपर्क साधला होता, असे आता स्पष्ट झाले आहे; मात्र भाजपने त्याबाबत मौन बाळगले आहे.