मालाड : मुंबई महापालिकेतर्फे अनेक ठिकाणी गरजूंना तयार अन्न दिले जात आहे; मात्र काही ठिकाणी हे अन्न निकृष्ट असल्याच्या तक्रारी येत आहे. पालिकेच्या मालाड पी उत्तर विभागातर्फेही परिसरात खिचडी दिली जात आहे; मात्र तिचा दर्जा खराब असल्याने अनेक जण ती फेकून देत असल्याची तक्रार पालिका आयुक्त आणि पी उत्तर विभागाच्या अधिकाऱ्यांकडे स्थानिकांनी केली आहे. 

वाचा सविस्तर संकट आहे गंभीर, पण मुंबई पालिका आहे खंबीर

मालाडमध्ये प्रत्येक नगरसेवकाच्या माध्यमातून गरजूंना खिचडी देण्यात येत आहे; मात्र यातील तांदूळ कच्चे, मीठ आणि तिखटाचे प्रमाण अधिक असल्याने नागरिक ती फेकून देत असल्याचे तक्रारीत म्हटले आहे. याबाबत स्थानिक संतोष चिकणे यांनी पालिकेकडे तक्रार केली आहे.

काही दिवसांपूर्वी याबाबत पालिका सहायक आयुक्तांनी कंत्राटदाराला समज दिली होती. त्याच्या दुसऱ्या दिवशी कंत्राटदाराने राजमा भात दिला; मात्र एकच दिवस दाखवण्यापुरते चांगले अन्न दिल्यानंतर पुन्हा निकृष्ट दर्जाचे अन्न पुरवले जात असल्याचे त्यांनी म्हटले आहे. 

सध्या मुस्लिम बांधवाचा रोजा सुरू आहे. येथील प्रभाग क्रमांक 33 मध्ये मुस्लिम समाज मोठ्या संख्येने राहतो. त्यामुळे संध्याकाळी 5 वाजेपर्यंत अन्न दिले जावे, अशी मागणी त्यांनी केली आहे.

तुम्हालाही आले का घरपोच मद्याची ऑफर? आधी हे वाचा...

काही वेळेस रात्री 9 वाजता जेवण आल्याने लोकांची गैरसोय होत असल्याचे त्यांनी म्हटले आहे. सकाळी 7 वाजता शिजलेले अन्न दुपारी 2-3 वाजता मिळते. त्यामुळे ताजे अन्न त्यांना मिळत नाही. यासाठी पालिकेने प्रभागातच किचन सुरू करावे, या कामात स्थानिक नागरिक व स्वयंसेवी संस्था आवश्‍यक मदत करण्यास तयार असल्याचेही त्यांनी म्हटले आहे. 

बदल केवळ तात्पुरते 

• पालिकेच्या पी उत्तर विभागाचे सहाय्यक आयुक्त संजोग कबरे यांनी रमजाननिमित्त नागरिकांची योग्य काळजी घेत असल्याचे म्हटले आहे. यानिमित्त त्यांना खिचडीऐवजी अधुनमधून चपाती भाजी, राजमा भात व बिर्याणीही देत असल्याचे त्यांनी म्हटले आहे;
• तर तक्रारदार संतोष चिकणे यांनी अधिकरी लक्ष देतात तेव्हा तात्पुरते बदल केले जातात; मात्र पुन्हा निकृष्ट अन्नच पुरवले जात असल्याचे म्हटले आहे. त्यामुळे अधिकाऱ्यांनी अन्नाच्या दर्जाबाबत काटेकोर लक्ष देण्याची मागणी त्यांनी केली आहे.