मुंबईच्या महापौर किशोरी पेडणेकर(kishori pednekar) यांना जीवे मारण्याची धमकी देण्यात आली आहे. एका पत्राद्वारे ही धमकी देण्यात आली. तसेच संबंधित पत्रात अश्लील भाषेचा वापर करत महापौरांना(mumbai mayor) शिवीगाळही झाली आहे.

माझ्या दादाकडे बघशील तर परिणाम वाईट होतील असे सांगून अश्लिल भाषेत धमकी देणारे हे पत्र महापौर निवासस्थानाच्या पत्त्यावर आलं आहे. या पत्रात महापौरांच्या कुटुंबियांनाही गोळ्या घालून मारण्याची धमकी देण्यात आली आहे. यावर पेडणेकर यांनी पत्रकारांशी संवाद साधला. यावेळी त्यांना पत्रकार परिषदेतच रडू कोसळलं.

पेडणेकर यांना शीवीगाळ करण्यात आली आहे. त्यांच्या चारित्र्यावर हीनपणे आरोप करण्यात आले आहे. यामुळे राजकारणाची पातळी खालावल्याचं त्यांनी म्हटलंय. यावेळी त्यांनी आशिष शेलार(Ashish Shelar) यांनी केलेल्या वक्तव्याचाही उल्लेख केला. अशा प्रकारांमुळे राज्यातील जनतेचा आणि शिवसेनेचा अपमान झाल्याचं पेडणेकरांनी म्हटलं.

मागील तीन दिवसांपासून किशोरी पेडणेकर यांच्याभोवती काँट्रोव्हर्सी सुरू आहे. भाजपचे आमदार आशिष शेलार (MLA ashish shelar) यांनी पत्रकार परिषदेत किशोरी पेडणेकरासंदर्भात केलेल्या वक्तव्यामुळे त्यांच्याविरोधात गुन्हा नोंदवण्यात आला आहे. याप्रकरणात त्यांना अटक होणार असल्याची बातमी येत असतानाच ऑन टेबल जामीन मंजूर करण्यात आला. यानंतर हे पत्र आल्याने राजकीय परिस्थिती ढवळून निघत आहे. भाजपचे आमदार अतुल भातखळकर यांनी संबंधित प्रकरणाचा कसून तपास करण्यासाठी आवाहन केलंय.