मुंबई : म्हाडाच्या मुंबई मंडळामार्फत मानखुर्द येथील 2018 मध्ये काढलेल्या सदनिका सोडतीमध्ये विजेत्या ठरलेल्या विजेत्यांना मंडळाने पैसे भरण्यासाठी अखेरची संधी दिली आहे. विजेत्यांना देकरपत्रात दिलेल्या मुदतीमध्ये पैसे न भरल्यास सदनिकेचे वितरण रद्द करण्याचा इशारा, मुंबई मंडळाचे उपमुख्य अधिकारी यांनी दिला आहे.

मुंबई मंडळाने डिसेंबर 2018 मध्ये एक हजार 384 घरांची सोडत काढली होती. या सोडतीमध्ये संकेत क्रमांक 352 क्रमांकाच्या पीएमजीपी मानखुर्द येथील 265 घरांचा समावेश होता. मात्र सोडतीमध्ये यशस्वी झालेल्या अर्जदारांना घराचा ताबा अद्याप मिळालेला नाही. कोरोना काळात महानगरपालिकेने ही घरे क्वारंटाइन सेंटर म्हणून ताब्यात घेतली होती.

गेल्या काही दिवसांपूर्वी हि घरे पुन्हा महानगरपालिकेने म्हाडाच्या ताब्यात दिली आहेत. मात्र क्वारंटाइन सेंटरमध्ये राहणाऱ्या व्यक्तींनी येथे तोडफोड केल्याने घरांचे नुकसान झाले आहे. हि घरे सुस्थितीत करून देण्याची मागणी म्हाडाने पालिकेकडे केली होती. त्यानुसार महापालिकेने या घरांची दुरुस्ती करून पुन्हा म्हाडाकडे दिली आहेत.

यानंतर मंडळाने मानखुर्द येथील विजेत्या अर्जदारांना सुधारित देकरपत्र पाठवले आहे. त्यानुसार विजेत्यांना सदनिकेची विक्री किमतीचे 25 टक्के रक्कम 30 दिवसात आणि शिल्लक रक्कम पुढील 60 दिवसात भरण्याची मुदत दिली आहे. दिलेल्या मुदतीमध्ये विजेत्यांनी रक्कम न भरल्यास त्याच्या सदनिकेचे वितरण रद्द करण्यात येईल, असे उपमुख्य अधिकाऱ्याने सांगितले.