Ulhasnagar News: महाराष्ट्र आणि कामगार दिनानिमित्ताने महानगरपालिकेने 1 ते 3 मे पर्यंत मतदारांत मतदान जनजागृतीसाठी 'चला पुस्तकांशी दोस्ती करूया' या संकल्पनेवर आधारित भव्य पुस्तक प्रदर्शनाचा नाविन्यपूर्ण उपक्रम उल्हासनगरातील सिंधू भवन सभागृहात आयोजित करण्यात आला आहे.

आयुक्त अजीज शेख,अतिरिक्त आयुक्त जमीर लेंगरेकर यांची ही संकल्पना आहे.पुस्तक प्रदर्शनास भेट देणाऱ्या वाचकांना 10 टक्के सवलत मिळणार आहे.पण ज्या वाचकांकडे मतदान ओळखपत्र असेल अशा वाचकांना अतिरिक्त 10 टक्के म्हणजे एकूण 20 टक्के सवलत पुस्तक खरेदीवर मिळणार आहे.

इतकेच नाही तर ज्या वाचकांकडे मतदान ओळखपत्र नसेल त्यांना मतदान ओळखपत्र मिळवण्यासाठी जी प्रक्रिया आहे त्याची माहिती देण्यासाठी विशेष कक्ष या पुस्तक प्रदर्शनात असणार आहे.या कक्षात मतदान ओळखपत्राची प्रक्रीया सुरु केल्यास त्या वाचकाला देखील अतिरिक्त 10 टक्के सवलतीचा लाभ पुस्तक खरेदीवर घेता येणार आहे.

त्यासोबतच या पुस्तक प्रदर्शनात मतदार जनजागृतीसाठी एक प्रतिज्ञा वाचकांकडून लिहून घेतली जाणार आहे आणि त्यापैकी एका भाग्यवान विजेत्याला दर दिवशी विशेष पारितोषिक दिले जाणार आहेत.यावेळी उपायुक्त मुख्यालय किशोर गवस,उपायुक्त डॉ.सुभाष जाधव उपस्थित राहणार आहेत.

या पुस्तक प्रदर्शनात महानगरपालिकेच्या अखत्यारितील विविध शाळांत शैक्षणिक अभ्यासक्रमाव्यतिरिक्त इतर उपक्रमात विशेष नैपुण्य मिळवणाऱ्या विद्यार्थ्यांसोबत त्यांच्या या नैपुण्याला विशेष प्रोत्साहन देणाऱ्या त्यांच्या पालकांचा,शिक्षकांचा आणि शाळेच्या मुख्याध्यापकांचाही विशेष सत्कार करण्यात येणार आहे.

त्यासोबतच उल्हासनगरातील अभिषेक टाले यांनी नुकतीच प्रतिष्ठेची केंद्रीय लोकसेवा आयोगाची परीक्षा उत्तीर्ण केली.अभिषेक यांचा सन्मानपूर्वक गौरव आयुक्त अजीज शेख यांच्या हस्ते करण्यात येणार आहे.

या तीन दिवसीय पुस्तक प्रदर्शनास 50 हजारापेक्षा जास्त मराठी,इंग्रजी,हिंदी व सिंधी पुस्तके उपलब्ध आहेत.यासाठी सदामंगल पब्लिकेशन ही संस्था सहकार्य करत आहे.शहरातील नागरिकांसह कल्याण,अंबरनाथ,बदलापूर येथील पुस्तक प्रेमी नागरिकांनी या प्रदर्शनास भेट द्यावी असे आवाहन आयुक्त अजीज शेख,अतिरिक्त आयुक्त जमीर लेंगरेकर यांनी केले आहे.