मुंबई : किराणा दुकानातून परवानगीविना सॅनिटायझरची सर्रास विक्री केली जात असल्याच्या तक्रारी प्राप्त झाल्या आहेत. यावर व्यापारी असोसिएशनने वेळीच निर्बंध घालावेत, तसेच रीतसर परवानगी घेऊनच विक्री करावी; अन्यथा संबंधित दुकानाचा परवाना रद्द केला जाईल, असा इशारा अन्न व औषध प्रशासनाकडून व्यापाऱ्यांना देण्यात आला आहे. 

नक्की वाचा : गुड न्यूज आली,  कोरोना संक्रमित मातांकडून 203 सुखरूप बाळांचा जन्म

कोरोना विषाणूपासून बचावासाठी सॅनिटायझरची मागणी वाढली आहे. त्याचा गैरफायदा घेत काही व्यापारांकडून विनापरवानगी सॅनिटायझरची विक्री केली जात आहे. दरम्यान, औषध व सौंदर्य प्रसाधने कायद्यात कलम 18 क नुसार सॅनिटायझरची साठवणूक, फार्मासिस्टशिवाय किरकोळ, घाऊक विक्रीसाठी परवाना नमुना 20 अ, 20 बीची तरतूद आहे. त्यासाठी ऑनलाइन अर्ज सादर करून रीतसर परवानगी घेणे अनिवार्य आहे. मात्र आता कोरोना विषाणू संसर्गाच्या पार्श्वभूमीवर नियमांचे सर्रास उल्लंघन करून शहर व जिल्ह्यातील किराणा दुकानदार सॅनिटायझर विक्री करत असल्याच्या तक्रारी प्राप्त झाल्याने अन्न व औषध प्रशासनाने कारवाईसाठी हालचाली सुरू केल्या आहेत.

हे वाचा : 'त्या' व्हिडिओवरुन काँग्रेस प्रवक्ते सचिन सावंत यांचा भाजपवर हल्लाबोल

दुकानदारांनी विनापरवाना सॅनिटायझरचा साठा करून ठेवणे, विक्री करणे कायद्याने गुन्हा ठरतो. अशा विक्रेत्यांवर कारवाई होणार आहे. त्यामुळे दुकानदारांनी विनापरवाना सॅनिटायझरचा साठा करून विक्री थांबवावी, असे आवाहन अन्न व औषध प्रशासनाकडून करण्यात आले आहे.

License revoked if selling unlicensed sanitizer, warning traders