मुंबई  : राज्य आणि रेल्वे प्रशासनाच्यावतीने लोकल प्रवास करताना कोरोना नियमांचे पालन करण्याचे आवाहन केले जात आहे. मात्र अत्यावश्यक सेवेतील कर्मचाऱ्यांकडून कोरोना नियमांचे उल्लंघन होत असल्याची माहिती समोर आली आहे. विनामास्क किंवा व्यवस्थित मास्क न घातलेल्या प्रवाशांना पकडल्यास सरकारी, महापालिका कर्मचारी, पोलीस कर्मचारी असल्याचे सांगून, ओळखपत्र दाखून दंड न भरता स्थानकात प्रवेश करत आहेत. सुमारे 80 टक्के अत्यावश्यक सेवेतील कर्मचारी विनामास्क फिरताना सापडत आहेत, अशी माहिती स्थानकावर कर्तव्य बजाविण्याऱ्या क्लिनिक मार्शलच्या कर्मचाऱ्यांनी दिली. त्यामुळे अत्यावश्यक सेवेतील कर्मचाऱ्यांमुळे सर्वसामान्य प्रवाशांच्या लोकल प्रवासावर टांगती तलवार असल्याची भूमिका प्रवासी संघटनेकडून व्यक्त करण्यात आली.

राज्य सरकार, रेल्वे प्रशासन, महापालिका प्रशासनाद्वारे कोरोना विषाणूचा प्रसार रोखण्यासाठी कठोर नियमावली तयार केली आहे. कोरोनाच्या प्रादुर्भावापासून वाचण्यासाठी मास्क वापरणे, गर्दीचे नियोजन करणे, या नियमांचे पालन करण्याचे आवाहन केले आहे. प्रवाशांनी कोरोना नियमांचे पालन करण्यासाठी क्लिनिक मार्शल पथकाची नियुक्ती केली आहे. मात्र, सर्वसामान्य प्रवाशांऐवजी अत्यावश्यक सेवेतील कर्मचारीच विनामास्क सापडत असल्याची माहिती दादर रेल्वे स्थानकावरील क्लिनिक मार्शल कर्मचाऱ्यांनी दिली. त्यामुळे अत्यावश्यक सेवेतील कर्मचारी क्लिनिक मार्शल पथकासाठी डोकेदुखी झाली आहे.

मुंबई, ठाणे, पालघर, रायगड परिसरातील बातम्या वाचा एका क्लिक वर

विना मास्क किंवा व्यवस्थित मास्क न घातलेल्या प्रवाशांकडून 200 रुपये दंड आकारला जात आहे. मात्र, 20 टक्के सर्वसामान्य प्रवासी आणि 80 टक्के अत्यावश्यक सेवेतील कर्मचारी विना मास्क प्रवास करत आहेत. अत्यावश्यक सेवेतील कर्मचाऱ्यांवर कारवाई केल्यास ओळखपत्र दाखवून क्लिनिक मार्शलबरोबर भांडणे होत असल्याचे प्रकार दररोज घडत आहेत. 

सीएसएमटी आणि दादर येथील महिला क्लिनिक मार्शल कर्मचाऱ्यांनी सांगितले की, विना मास्क लोकल प्रवास करणाऱ्या प्रवाशांवर कारवाई करण्याचे आदेश आहे. मात्र सर्वसामान्य प्रवाशांपेक्षा मंत्रालय, मुंबई महापालिका, पोलीस, रेल्वे इतरही शासकीय कर्मचारी विना मास्क प्रवास करत आहे. या कर्मचाऱ्यांवर कारवाई केल्यास शासकीय ओळखपत्र दाखवून आम्हाला सोडण्याची विनंती करतात. त्यानंतर या अत्यावश्यक सेवेतील कर्मचाऱ्यांच्या ओळखपत्राचा फोटो काढून ठेवला जातो. मात्र, ते दंड भरत नाहीत. तर, काही कर्मचारी दंड भरून जातात. दररोज सुमारे 80 टक्के अत्यावश्यक सेवेतील कर्मचारी विनामास्क भेटत आहेत.

रेल्वे परिसरात दाखल होणाऱ्या विनामास्क प्रवाशांवर महापालिकेच्या मदतीने कारवाई केली जात आहे. विनामास्क कोणताही प्रवासी असो, त्यावर कारवाई होणे आवश्यक आहे.
- शिवाजी सुतार, मुख्य जनसंपर्क अधिकारी, मध्य रेल्वे

1 फेब्रुवारी ते 21 फेब्रुवारीपर्यंत मध्य रेल्वे मार्गावरील एकूण 3 हजार 437  प्रवाशाना पकडण्यात आले आहे. त्यांच्याकडून तब्बल 8 लाख 6 हजार 900 रुपयांचा दंड वसूल केला आहे. तर, पश्चिम रेल्वे मार्गावरील एकूण 2 हजार 200  प्रवाशांवर कारवाई करण्यात आली आहे. त्यांच्याकडून 2 लाख 21 हजार रुपयांचा दंड वसूल केला आहे.

----------------------------------------------

( Edited by Tushar Sonawane  )

local train mumbai marathi news update ordinary public not allow latest update