डोंबिवली : कोरोना विषाणूमुळे उद्योग, व्यवसाय ठप्प पडले असून सर्वांचाच आर्थिक गाडा घसरला आहे. कोरोना विषाणूचा प्रादुर्भाव रोखण्यासाठी लॉकडाऊन वाढविण्याचा निर्णय सरकारने घेतला. मात्र वाढलेल्या या लॉकडाऊनमुळे जीवनावश्यक वस्तूंचे भाव दिवसेंदिवस गगनाला भिडत असल्याने सर्वसामान्यांच्या घरखर्चाचे बजेट पूर्णपणे कोलमडले आहे.

कुटूंबातील आर्थिक स्त्रोत थंडावल्याने तिपटीने, पाचपटीने वाढलेल्या भाजी व किराणा मालाच्या किमती पाहून सर्वसामान्यांचे डोळे विस्फरले आहेत. कल्याण-डोंबिवली शहरात तर यामुळे दुकानदार आणि ग्राहक यांच्यामध्ये वादाचे प्रसंग उद्भवत आहेत. 

क्लिक करा : कोरोनाविरोधात अख्खे कुटुंबच मैदानात

लॉकडाऊन घोषित होताच जीवनावश्यक वस्तूंच्या भावात कोणतीही दरवाढ केली नसल्याचे सांगत सरकारने नागरिकांना दिलासा दिला होता. मात्र, लॉकडाऊनचा कालावधी जसजसा वाढत गेला तसतसे दुकानदारांनी हळूहळू भाववाढ केली. मालवाहतूक ठप्प असून कामगारही मिळत नाहीत. परिणामी डाळींच्या किमतीतही सुमारे 20 ते 60 टक्क्यांनी वाढ झाली आहे.

घाऊक बाजारातही डाळींची आवक कमी झाली असल्याने डाळींचे भाव वाढल्याचे दुकानदार जयेश पाटील यांनी सांगितले. ज्या वस्तूंवर किमती छापील आहेत त्यांचे पैसे तितकेच आकारले जातात. मात्र इतर सुटा किराणा घेताना वाढत्या किमतीबाबत विचारणा केली असता ग्राहकांना दुकानदारांकडून उत्तरे दिली जातात. सद्यपरिस्थितीत ग्राहकांचाही नाईलाज असल्याने जादा पैसे देऊन आला दिवस ढकलण्याचा पराक्रम नागरिकांना करावा लागत आहे. 

क्लिक करा : विदेशीचे वांदे...तळिरामांचा स्वदेशीकडे मोर्चा

अशी झाली वाढ
   100 रुपये प्रतिकिलो असणारी मूगडाळ आता 140-150 रुपयांना तर 100 रुपये किलो असणारी मटकी 150-160 दराने विकली जात आहे. उडीद डाळीच्या किमतीत 15 ते 30 रुपये तर तूरडाळीचे दरही 10 ते 20 रुपयांनी वाढल्याचे चित्र आहे.

ठोक विक्रेत्यांकडून माल येत नाही. मालवाहतुकीसही अडचणी येत असल्याचे दुकानदार सांगतात. धान्य साठा मुबलक प्रमाणात असूनही काही दुकानदार अपुऱ्या मालाची कारणे देत ग्राहकांची लूट करत आहेत.
- नमिता देसाई, गृहिणी

किराणा मालाच्या आधीच्या व आताच्या किमती (प्रतिकिलो)

साखर       35-42 
तेल           95-120 
शेंगदाणे     90-130
साबुदाणा   70-80 
खोबरे        170-200 

भाजीपाल्याच्या आधीच्या व आताच्या किमती (प्रतिकिलो) 

भेंडी      40-70
टोमॅटो   20-30
वांगी     10-30
मिरची   40-70 
आलं     60-80 
लसूण   120-160