पनवेल : महाराष्ट्र एटीएसने (Maharashtra ATS) केलेल्या कारवाईत मुंबईतील (mumbai) जोगेश्वरी विभागातून झाकीर नावाच्या संशयित दहशतवाद्याला (terrorist) ताब्यात घेतले आहे. काही दिवसांपूर्वीच दिल्लीत (delhi) अटक करण्यात आलेल्या सहा संशयित दहशतवाद्यांशी झाकीरचा संबंध असल्याची माहिती समोर आल्याने नवी मुंबई पोलिसही (Navi Mumbai police) सतर्क झाले आहेत.

त्यापार्श्वभूमीवर आज रेल्वे पोलिस, तसेच रेल्वे सुरक्षा दलाने एकत्र पाहणी करत पनवेल तसेच नवी मुबंई परिसरातील रेल्वेस्थानकांच्या सुरक्षेचा आढावा घेतला. दहशतवादी सणासुदीदरम्यान रेल्वेस्थानकांना टार्गेट करण्याची शक्यता वर्तवण्यात आली आहे. त्यामुळे केंद्र सरकार, तसेच राज्य सरकारकडूनही खबरदारीच्या सूचना स्थानिक प्रशासनांना देण्यात आल्या आहेत. त्यात रविवारी (ता. १९) गणेश विसर्जन असल्याने नवी मंबई ​पोलिसांनी जागोजागी नाकाबंदी करत तपासणी सुरू केली आहे. खबरदारीचा उपाय म्हणून पनवेल, तसेच नवी मुंबई रेल्वे पोलिसांच्या कार्यक्षेत्रात येणाऱ्या रेल्वे स्थानकांची सुरक्षा वाढवण्यात आल्याची माहिती रेल्वे पोलिसांच्यावतीने देण्यात आली आहे.