मुंबई : राज्यात सध्या सरकार स्थापनेच्या घडामोडींना वेग आलाय. भाजप-शिवसेना यांच्यात तडजोड होऊन, महायुतीचेच सरकार स्थापन होण्याची चिन्हे दिसत आहेत. त्यासाठी विधानसभा निवडणुकीत 105 जागांसह सर्वांत मोठा पक्ष असलेला भाजप राज्यपालांपुढे सत्ता स्थापनेचा दावा करणार आहे. 

मुनगंटीवारही म्हणतात, मुख्यमंत्री शिवसेनेचाच

भाजपची भूमिका काय?
सध्या भाजप नेते राज्यपालांना भेटण्याच्या तयारीत आहेत. यात भाजप प्रदेशाध्यक्ष चंद्रकांत पाटील, सुधीर मुनगंटीवार, आशिष शेलार यांच्यासह मुख्यमंत्री देवेंद्र फडणवीस यांच्यासह इतर नेते राज्यपालांची भेट घेणार आहेत. तत्पूर्वी, मुख्यमंत्री फडणवीस यांच्या वर्षा या सरकारी निवासस्थानी भाजप नेत्यांची बैठक होत आहे. या बैठकीत शिवसेनेला मुख्यमंत्रिपद सोडायचे का? खातेवाटप कसे होणार? या विषयी भाजप नेत्यांमध्ये चर्चा होणार आहे. भाजपने गेल्या काही दिवसांत मुख्यमंत्रिपदसोडून इतर खाती शिवसेनेला देण्याची भूमिका जाहीर केली होती. पण, शिवसेना मुख्यमंत्रिपदावर ठाम असल्याचे सांगितले जात आहे. 

शिवसेनेचे आमदार फोडण्याची कोणाची हिंमत नाही : राऊत

शिवसेनेला आमदार फुटीची भीती
दरम्यान, शिवसेनेच्या आमदारांची आज पक्षप्रमुख उद्धव ठाकरे यांनी बैठक घेतली. त्यात उद्धव ठाकरे यांनी आमदारांना मुंबई न सोडण्याचे आदेश दिले आहेत. भाजपकडून, शिवसेनेचे आमदार फोडण्याची शक्यता असल्यामुळे मुंबईत शिवसेना आमदारांना हॉटेलवर एकत्र ठेवण्यात येणार आहे. 'शांत रहा, एकत्र रहा,' असा संदेश उद्धव ठाकरे यांनी आमदारांना दिल्याचे सांगितले जाते.