मुंबई: महाराष्ट्राचे गृहमंत्री अनिल देशमुख यांच्यावरील भ्रष्टाचाराच्या आरोपांची चौकशी करण्यासाठी राज्य सरकारने एक सदस्यीय समिती स्थापन केली असली, तरी गृहमंत्रीपदावरुन देशमुखांना बदलण्यासाठी उद्धव ठाकरे आग्रही आहेत. गृहमंत्री देशमुखांची चौकशी सुरु आहे. त्यामुळे त्यांच्याकडून गृहखाते काढून घेऊन, दुसऱ्या खात्यात त्यांची बदली करावी, अशी उद्धव ठाकरेंची भूमिका असल्याचे शिवसेनेतील अंतर्गत सूत्रांनी सांगितले. हिंदुस्थान टाइम्सने हे वृत्त दिले आहे. 

हे लगेच शक्य नसेल, तर मंत्रिमंडळात काही फेरबदल करण्यात येतील, त्यावेळी हा खाते बदल करावा, असे ठाकरेंना वाटत असल्याचे सेनेतील वरिष्ठ नेत्याने सांगितले. उद्धव ठाकरे आणि राष्ट्रवादीचे अध्यक्ष शरद पवार यांच्यात अजून या संदर्भात चर्चा व्हायची बाकी आहे, असे सेना नेत्याने सांगितले. अनिल देशमुखांनी गृहखाते ज्या पद्धतीने हाताळले, त्यावर उद्धव ठाकरे नाराज आहेत. याआधी झालेल्या एका बैठकीत उद्धव ठाकरेंनी आपलं याबद्दलच मत  शरद पवारांना सांगितलं होतं, असं सेना नेत्याने सांगितलं.  

लोकलमध्ये उभे राहून प्रवास केल्यास होणार कारवाई?

"मंत्रिमंडळात काही फेरबदल होऊ शकतात. सचिन वाझे प्रकरण ज्या पद्धतीने हाताळले गेले, त्यावर मुख्यमंत्री नाराज आहेत. गृहमंत्र्यांची आपल्या खात्यावर पकड नाहीय, असे मुख्यमंत्र्यांना वाटते. गृहमंत्र्यांपेक्षा विरोधी पक्षनेते देवेंद्र फडणवीसांकडे किती जास्त माहिती असते, ते आपण पाहिले आहे" असे शिवसेनेच्या नेत्याने सांगितले. येत्या काही दिवसात ठाकरे आणि पवार या मुद्यावर चर्चा करतील. 

"सरकारने केलेले नियम पाळायचेच नसतील तर..."

"सचिन वाझे प्रकरणामुळेच मुख्यमंत्री ठाकरे देशमुखांवर नाराज नाहीयत, तर सुशांत सिंह राजपूत मृत्यू प्रकरण ज्या पद्धतीने हाताळले ते ही मुख्यमंत्र्यांना पटले नव्हते" असे शिवसेना नेत्याने सांगितले. मुंबई उच्च न्यायालयाचे निवृत्त न्यायमुर्ती कैलाश उत्तमचंद चांदीवाल हे गृहमंत्री देशमुखांवरील आरोपांची चौकशी करणार आहेत. मुंबईचे माजी पोलीस आयुक्त परमबीर सिंह यांनी काही दिवसांपूर्वी मुख्यमंत्र्यांना पत्र लिहून अनिल देशमुखांनी सचिन वाझेला महिन्याला १०० कोटीच्या वसुलीचे टार्गेट दिल्याचा गंभीर आरोप केला होता. यानंतर राज्याच्या राजकारणात एकच खळबळ उडाली होती. परमबीर सिंह यांनी या प्रकरणात उच्च न्यायालयात एक जनहित याचिकाही दाखल केली. त्यावर आज कोर्टाचा आदेश येईल.