मुंबई: कोविड निर्बंधांबाबत (covid restriction) सोमवारी राज्य सरकारने सुधारित नियमावली जाहीर केली आहे. त्या आधारे मुंबई महापालिकेने (BMC) दिलासा देत दुकाने, (shops) आस्थापने आता रात्री १० वाजेपर्यंत सुरू ठेवण्याची परवानगी दिली आहे. महाराष्ट्रातील संसर्गदर कमी असलेल्या २२ जिल्ह्यातील निर्बंध शिथिल करण्याचा निर्णय राज्य सरकारने अखेर घेतला असून आता दुकाने, मॉल, (Mall) जिम, स्पा, केशकर्तनालये सोमवार ते शुक्रवार रात्री आठ वाजेपर्यंत उघडी ठेवण्यास परवानगी देण्यात आली आहे.

राज्य सरकारच्या या निर्णयाबद्दल मनसेचे सरचिटणीस आणि प्रवक्ते संदीप देशपांडे यांनी मुख्यमंत्री उद्धव ठाकरेंचं उपरोधिकपणे कौतुक केलय. काल आमचे मुख्यमंत्री जगात भारी, म्हणत देशपांडेंनी उपरोधात्मक टीका केली होती. "आस्थापना उघडली, आता जनतेला प्रवासासाठी शिवपंख लावून द्या, लोक कामाला उडत उडत येतील" असं संदीप देशपांडे यांनी म्हटलं आहे.

"सी.एम साहेब आपण सर्व आस्थापना चालू केल्याबद्दल आपले आभार. लोकल बंद आहेत बस ला प्रचंड वेळ लागतो गर्दी ही असते. आपल्याला विनंती आहे या सर्व लोकांच्या पाठीवर जर आपण शिव पंख लावून दिलेत तर त्यांना कामावर ही जाता येईल आणि त्रास पण नाही.मला खात्री आहे आपण हे करू शकता आमचा सीएम जगात भारी" असे संदीप देशपांडे यांनी टि्वटमध्ये म्हटले आहे.

कालच्या टि्वटमध्ये काय म्हटलं होतं?

"पाहिले एकच म्हण होती "तळे राखी तो पाणी चाखी" या सरकारच्या काळात अनेक नव्या म्हणींचा जन्म झालाय" असे संदीप देशपांडे यांनी सोमवारच्या टि्वटमध्ये म्हटले होते. "मराठी भाषेला नवीन म्हणी बहाल केल्याबद्दल मुख्यमंत्रांचे जाहीर आभार" असे उपरोधिक शब्दात म्हटले आहे.

"पाहिले एकच म्हण होती" तळे राखी तो पाणी चाखी"या सरकारच्या काळात अनेक नव्या म्हणींचा जन्म झालाय"शहर राखी तो बिर्याणी चाखी" "महापालिका राखी तो कमिशन चाखी" सरकार राखी तो वसुली चाखी"मराठी भाषेला नवीन म्हणी बहाल केल्याबद्दल मुख्यमंत्रांचे जाहीर आभार. आमचा सी.एम जगात भारी" अशी उपरोधिक टीका केली होती.