१०० कोटींच्या वसुली प्रकरणी अनिल देशमुखांच्या घरावर ईडी छापेमारी

मुंबई: राज्याचे माजी गृहमंत्री अनिल देशमुख (Anil Deshmukh) यांच्या अडचणी वाढत आहेत. शुक्रवारी सकाळी सात वाजल्यापासूनच अनिल देशमुख यांच्या नागपूरच्या (Nagpur) आणि मुंबईच्या घरांवर आणि इतर मालमत्तांवर ईडीने (Enforcement Directorate) छापेमारी केली. छापेमारीच्या वेळी अनिल देशमुख मुंबईतील (Mumbai) वरळीच्या घरी होते. अनिल देशमुख यांच्या मुंबईतील शासकीय निवासस्थानाची (Official Residence) म्हणजेच ज्ञानेश्वरी बंगल्याचीही (Dynaneshwari Bungalow) ईडीने झाडाझडती घेतली. ईडीच्या या कारवाईमुळे सध्या राजकीय वर्तुळात विविध चर्चांना उधाण आलं असतानाच भाजप नेते नारायण राणे यांनी आपली प्रतिक्रिया व्यक्त केली. (Mahavikas Aghadi Ex Minister Anil Deshmukh Houses Properties Raided by ED BJP Narayan Rane Reaction)

अनिल देशमुख यांना अटक करण्याची तयारी ईडीकडून केली जात असल्याच्या चर्चा राजकीय वर्तुळात रंगल्याचे दिसत आहे. अशा वेळी भाजप नेते विरूद्ध महाविकास आघाडीचे नेते यांच्यात तू तू मै मै रंगल्याचे चित्र आहे. या कारवाईबद्दल नारायण राणे म्हणाले, "राष्ट्रवादी आणि काँग्रेसने ईडीच्या कारवाईमध्ये राजकारण आणू नये. ईडीची कारवाई हा कोणत्याही राजकीय गोष्टींशी संदर्भ असलेला भाग नसतो. ईडी ही एक स्वतंत्र संस्था आहे आणि त्यांचा तपासदेखील स्वतंत्र स्तरावरच सुरू असतो. सध्या मला अनिल देशमुखांबद्दल असंच म्हणता येईल की करावे तसे भरावे लागेल..."

विरोधी पक्षनेते प्रवीण दरेकर म्हणतात...

"ईडीकडून देशमुखांवर होत असलेली कारवाई कोणाच्याही आशीवार्दाने किंवा सूडभावनेतून केली जात नाही. ईडी स्वायत्त तपास यंत्रणा आहे. त्यामुळे तपास यंत्रणेचा भाग म्हणून ही कारवाई होत आहे. केंद्र सरकार आणि या कारवाईचा संबंध लावणे चुकीचं आहे. कुठल्याही तपास यंत्रणा स्वायत्त असून त्यांच्या पद्धतीनं काम करत असतात. त्यामुळे अशाप्रकारचं राजकरण केलं जात असून संबंधित विषयाला बगल देण्याचा प्रयत्न केला जात आहे. अनिल देशमुख यांच्या विरोधात ईडीची कारवाई आधीच सुरु आहे. या प्रकरणी ईडीने छापेही टाकले होते. तपास यंत्रणेचा भाग म्हणून ईडीकडून पुन्हा छापा टाकण्यात आला आहे. यापूर्वी काँग्रेसच्या काळात अशा प्रकारच्या अनेक कारवाया झाल्या आहेत. छापे टाकले गेलेत. सरकारने काही उद्देशाने या कारवाया केल्या होत्या असा संबंध लावणे उचित नाही. कारवाई होत असताना जर काही चुकीचं वाटत असेल तर त्यासाठी न्यायव्यवस्था आहे. मला विश्वास आहे की अशा प्रकारचं चुकीचं काम तपास यंत्रणा करणार ऩाही."