मुंबई : मनसुख हिरेन हत्या प्रकरणाचा तपास करणाऱ्या राष्ट्रीय तपास पथकानं अर्थात NIA नं हायकोर्टात प्रतिज्ञापत्र सादर केलं असून यामध्ये एन्काऊंटर स्पेशालिस्ट प्रदीप शर्मा हे मनसुख हिरेनच्या हत्येचे मुख्य सूत्रधार असल्याचं म्हटलं आहे. (Mansukh Hiren Murder Case Pradeep Sharma mastermind NIA affidavit Mumbai High Court)

NIA नं प्रतिज्ञापत्रात काय म्हटलंय?

NIA नं मुंबई हायकोर्टात दाखल केलेल्या प्रतिज्ञापत्रात माजी पोलीस अधिकारी प्रदीप शर्मा यांच्यावर गंभीर आरोप केले आहेत. एन्काऊन्टर स्पेशालिस्ट असलेले प्रदीप शर्मा हे मनसुख हिरेनच्या हत्येचे मुख्य सूत्रधार असल्याचं यामध्ये नमूद करण्यात आलं आहे. प्रतिज्ञापत्रात पुढे असंही म्हटलं की, कथित कट मुंबई पोलीस आयुक्ताच्या इमारतीत रचण्यात आला होता. या ठिकाणी प्रदीप शर्मा आणि इतर आरोपींमध्ये अनेक बैठक पार पडल्या.

दरम्यान, एपीआय सचिन वाझेनं मनसुख हिरेनची हत्या करण्यासाठी प्रदीप शर्मा यांना 45 लाख रुपये दिले.प्रदीप शर्मा यांनी दाखल केलेल्या जामीन अर्जावर NIA नं हे प्रतिज्ञापत्र हायकोर्टात सादर केलं आहे. हायकोर्टानं या प्रकरणाची सुनावणी १७ जुलै रोजी ठेवली आहे.