कोल्हापूर : येथील मनुग्राफ इंडिया कंपनीचे (Manugraph India Company) संस्थापक अध्यक्ष सनतभाई शहा (वय ९२) यांचे शुक्रवारी पहाटे मुंबई येथे वृद्धापकाळाने निधन झाले.

वृत्तपत्र मुद्रण व्यवसायासाठी वेगवान कोरोसेट तंत्रज्ञान त्यांनी (Sanatbhai Shah) देशात आणले आणि निरंतर संशोधनाच्या माध्यमातून त्यामध्ये आधुनिकता आणली. त्यांच्यामुळेच ‘मुद्रण व्यवसायाची पंढरी’ असा कोल्हापूरचा लौकिक झाला.

शहा यांनी कंपनी स्थापन करताना उपलब्ध कुशल मनुष्यबळ व पोषक वातावरण याचा अभ्यास करून विश्‍वासाने कोल्हापूरची निवड केली होती. १९७२ मध्ये येथील शिरोली एमआयडीसीमध्ये मशिनेन फॅब्रिक पॉलिग्राफ इंडिया लिमिटेड (आताची मनुग्राफ इंडिया) या कंपनीची मुहूर्तमेढ रोवली.

वेब पॉलिग्राफ या तत्कालीन पूर्व जर्मनीमधील कंपनीच्या सहकार्याने विविध मशिनच्या माध्यमातून ऑफसेट तंत्राची ओळख देशाला करून दिली. पुढे १९८८ मध्ये प्लामाग प्लूएन जर्मनी यांच्याशी संयुक्तपणे तर त्यानंतर ‘मनुग्राफ इंडिया’ या कंपनीच्या माध्यमातून अत्याधुनिक वृत्तपत्र छपाई यंत्रांचे उत्पादन त्यांनी सुरू केले.

वृत्तपत्र क्षेत्रात देशात त्यांनी एक नवा अध्याय निर्माण केला. त्यांच्या कल्पक आणि दूरदृष्टीच्या नेतृत्वाने ‘मनुग्राफ’च्या उत्पादनांना जगभरात लोकप्रियता मिळाली. कंपनीचे सध्याचे चेअरमन संजय शहा व व्हाईस चेअरमन तथा व्यवस्थापकीय संचालक प्रदीप शहा यांनी त्यांचीच परंपरा पुढे सुरू ठेवली आहे.