भाजपच्या केशव उपाध्येंचा ठाकरे सरकारला सवाल

मुंबई: मराठा आरक्षणाच्या मागणीवरून माजी आमदार नरेंद्र पाटील (Former MLA Narendra Patil) यांनी सोलापुरात मराठा क्रांती मोर्चाची (Maratha Kranti Morcha) हाक दिला. सकाळी 11च्या सुमारास सोलापुरातील श्री छत्रपती संभाजी महाराज चौकातून जिल्हाधिकारी कार्यालयाकडे हा मोर्चा रवाना होणार असं सांगण्यात आलं होतं. मात्र कोरोनाच्या संकटामुळे मोर्चाला परवानगी नाकारणाऱ्या पोलिसांनी कोल्हापूर, सांगली येथून बंदोबस्त मागवून नाकेबंदी केली. काल शांततापूर्ण मार्गाने आपला निषेध नोंदवणारे वारकऱ्यांना अटक करण्यात आली. या पार्श्वभूमीवर भाजपकडून ठाकरे सरकारवर कडक शब्दात टीका करण्यात आली. (Maratha Kranti Morcha in Solapur Police Force Deployed to stop Protest BJP Keshav Upadhye slams Uddhav Thackeray Govt)

'काल वारकऱ्यांवर कारवाई. आज सोलापूरात मराठा समाजाचा मोर्चा निघू नये म्हणून अभूतपूर्व बंदोबस्त आहे. आजूबाजूच्या जिल्ह्यातील पोलिस फौजफाटा, सर्व बाजूने रस्ते बंद.. मराठा समाजाने शांततेत मोठे मोर्चे काढलेत, मग ही दडपशाही कशासाठी? अशी दडपशाही करून आघाडी सरकारचं आरक्षण अपयश लोक कसं विसरतील?', असे ट्वीट करत भाजपचे प्रदेश मुख्य प्रवक्ते केशव उपाध्ये यांनी ठाकरे सरकारवर टीका केली.

दरम्यान, कोरोनाच्या संकटामुळे पोलिसांनी या मोर्चाला परवानगी नाकारली. या मोर्चामध्ये ग्रामीण भागातून आंदोलक मोठ्या प्रमाणावर येण्याची शक्यता असल्याने ग्रामीण पोलिसांनी कोल्हापूर, सांगली येथून बंदोबस्त मागविण्यात मागवला. तालुक्याच्या ठिकाणी साखळी पद्धतीने हा बंदोबस्त तैनात करण्यात आला. सोलापूर शहराकडे येणाऱ्या प्रत्येक रस्त्यावर बंदोबस्त असून प्रत्येक वाहनांची कसून चौकशी केली जात आहे. शनिवार, रविवारी संचारबंदी असल्याने अत्यावश्यक कामासाठीच वाहनांना प्रवेश दिला जात आहे.