ठाणे : ठाण्यातील अंतर्गत वाहतुकीचा ताण कमी करण्यासाठी शहराबाहेरून वाहतुकीचे योग्य नियोजन व्हावे, यासाठी पर्यायी मार्ग म्हणून कोपरी ते पटणी खाडीपूल, गायमुख ते खारबाव खाडीपूल, कोपरी - साकेत गायमुख कोस्टल मार्ग एमएमआरडीएच्या माध्यमातून विकसित करण्यात यावे, अशी मागणी ठाण्याचे महापौर नरेश म्हस्के यांनी नगरविकास मंत्री एकनाथ शिंदे यांच्याकडे केली आहे. 

राज्याच्या विविध भागांतून मुंबईच्या दिशेला जाणारी बहुतांश वाहने ही ठाण्यातून मार्गस्थ होतात. याचा परिणाम ठाण्यातील अंतर्गत वाहतुकीवर होत असून ठाणेकरांना दररोज वाहतूक कोंडीचा सामना करावा लागत आहे. ठाण्यात वाहतूक कोंडीसोबतच वाहनांमुळे होणाऱ्या प्रदूषणाचीही समस्या वाढत आहे. यावर कायमस्वरूपी तोडगा म्हणून मुंबईमध्ये येणारी व मुंबईतून बाहेर जाणारी वाहने ठाण्यातून न जाता परस्पर वळविल्यास ठाण्यातील वाहतूक कोंडी सुटण्यास मदत होईल.

ही बातमी वाचा ः जेव्हा बॅटमॅन पोलिसांकडे मागतो रेफरन्स, महाराष्ट्र पोलिस म्हणतात..

तसेच काही प्रमाणात इंधनाची बचतदेखील होईल. ठाण्यातून नवी मुंबईकडे जाणाऱ्या वाहनांना कळवा परिसरातून ये-जा करावी लागते. यामुळे कळवा खाडीपुलावर सातत्याने वाहतूक कोंडी होत असून कोपरी ते पटणीपर्यंत खाडीपूल तयार केल्यास, ठाण्याहून नवी मुंबईला कमी अंतराचा थेट मार्ग उपलब्ध होऊन वेळेची व इंधनाची बचत होईल. याबाबत एमएमआरडीएच्या माध्यमातून हा पूल व्हावा, अशी मागणी महापौर म्हस्के यांनी केली आहे.

भविष्यात नवीन ठाण्याला लाभ
मुलुंडपर्यंत विस्तारित होणारा पूर्व मुक्त मार्ग कोपरी - साकेत मार्गे गायमुखपर्यंत कोस्टल रोड तयार केल्यास ठाण्याच्या बाहेरून वाहनांची वाहतूक होऊन याचा त्रास ठाण्यातील अंतर्गत वाहतुकीला होणार नाही, या संदर्भात डीपीआर तातडीने तयार करण्यात यावा. तसेच भविष्यात निर्माण होणाऱ्या नवीन ठाण्याला याचा लाभ होईल, याबाबत महापालिकेने शासनाकडे प्रस्ताव सादर केला आहे. एमएमआरडीच्या विभागीय प्रकल्पात या पुलाचा समावेश करण्यात आला असून या संदर्भात तातडीने मंजुरी देण्याची मागणी महापौर म्हस्के यांनी नगरविकास मंत्री शिंदे यांच्याकडे केली आहे.