मुंबई - अंधेरी मेट्रो स्थानकात बॉम्ब ठेवल्याच्या अफवेप्रकरणी योगेंद्रप्रसाद रामेश्‍वर चौरसिया आणि शबीनाथ बसावंत विश्‍वकर्मा यांना अंधेरी पोलिसांनी शुक्रवारी अटक केली. स्थानिक न्यायालयाने त्यांना गुरुवारपर्यंत (ता. १५) न्यायालयीन कोठडी सुनावली आहे. 

अंधेरीतील चांदिवली परिसरात राहणारे चौरसिया आणि विश्‍वकर्मा गुरुवारी (ता. ८) सकाळी अंधेरी मेट्रो स्थानकात आले होते. वर्सोव्याहून घाटकोपरला जाणारी मेट्रो सकाळी ११ वाजण्याच्या सुमारास अंधेरी स्थानकात येण्यापूर्वी अचानक धावपळ सुरू झाली. त्या वेळी या दोघांना सुरक्षा रक्षकांनी ताब्यात घेतले. या घटनेमुळे काही काळ मेट्रो स्थानकात गोंधळाची स्थिती निर्माण झाली होती. सुरक्षा रक्षकांनी मेट्रोची पाहणी केली; मात्र काहीही आक्षेपार्ह आढळले नाही. 

बॉम्बची अफवा पसरवून मेट्रो थांबवून ठेवल्याबद्दल या दोघांना सुरक्षा रक्षकांनी अंधेरी पोलिसांच्या ताब्यात दिले. बम’ हा शब्द ऐकून आपण पळत असताना सुरक्षा रक्षकांनी पकडले, असे त्यांनी पोलिसांना सांगितले. त्यानंतर न्यायालयाने त्यांना १५ तारखेपर्यंत न्यायालयीन कोठडीत ठेवण्याचा आदेश दिला. याप्रकरणी अंधेरी पोलिस तपास करत आहेत.